Un all sei Troscht uf dere Welt,
Den hot's uf seine Schatz gestellt;
Doch leid't es net Vatter, net Motter.

Voll Mürigkät, do nuckt es ei,
Was Wunners werd nor an em sei;
Wie hoppelt so hortig sei Herzche!

Uf emol hupft es in die Heh,
De Berg enuf un rasch wie's Reh:
Ei werd es sei Glück wuhl verbasse?

»'s is wärlich wohr, s' is alles so,
Mei Tram, der hot mich net beloh:
Do blüht jo der wunnerlich Garte!«

Un's sieht un sucht net lang erum,
Es brecht sich schun die Schlüsselblum:
Do brecht es e goldige Schlüssel!

Am Derche kloppt es dreimol an,
Hot dann der Berg sich ufgedan,
Un uf is gedan do der Himmel!

Nor Marmelstee un Helfebee,
E Laschter Gold un Erelstee;
Es sieht sich net satt an de Wunner.

Un's traut sich net un will net vor,
E Stimmche ruft: »Ei nemm der nor;
's is alles for dich un dei Schätzche!« –

Es weß net, was es wähle soll,
Do rafft es seine Schorz sich voll;
Ei hot's doch de Schlüssel ans Derche!

»Nau bin ich reich un bin ich frei,
Un wann ich will, is Hochzig glei;
Doch baße mer zwe noch zesamme?« –

So kummt's erauser nor e Nu –
Un hinnig em is 's Derche zu:
Es hauser, un – drei is der Schlüssel!

Un net genunk, 's is meh dermär,
Es sucht un sucht – sei Schorz is leer;
Un trauerig schlockert's enunner.

Un 's Märe ruht im Gras im Dal,
Sei Gram is groß un groß sei Qual;
Es hot jo ke Vatter, ke Motter.

Un all sei Troscht uf dere Welt,
Der freit e Braut mit Gut un Geld:
So will es sei Vatter, sei Motter.

Geschieht is das uf Beurelstee,
So sieht m'r heut ke Blümche meh,
Ke Schlüssel ze hewe de Wunner.