Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Dat slohwitte Kind

De Schaper dreew to Hei' henuut
Un smeet sick daal in't Förenkruut:
Hie will ick slapen, slapen!
Do röp een Stimm dör sinen Droom:
»Mien Stuuw is hoch in'n Bökenboom,
Kumm rupp un maak mi apen!«

De Schaper ut den Slaap fohr up
Un kladder up den Boom henup,
He bruuk nich lang to söken.
Dat Lock in'n Boom fünn he geswind
Un tröck herupp een slowitt Kind
Wol ut de holle Böken.

»Och, Schaper, nimm mi mit na Huus,
Hier in den Lock is dat een Gruus,
To Huus is dat am besten.
To Huus dor ward hüt backt un röst't,
Dor fiert mien Mudder hüt eer Köst Hochzeit
Mit säw'n un säwentig Gästen.«

^* _* ^*

In't Kösthuus köm een Kindken rin:
»Och, Mudder, leewe Mudder mien,
Wat schall de Kranz von Rosen?«
»Och, Kind, schöll ick dien Mudder sien?!
Ick draag een Struuß von Rosmerin,
Ick draag mien Kranz von Rosen!« –

»Drigst du den Bruutkranz rosenroot,
Hest du doch all dree Kinner dood,
De bruukst du nich to söken:
Dat een ligt in de Kellereck,
Dat anner deep in'n Mählenbeck,
Dat drüdd stickt in de Böken.« –

Dood up de Eer sack daal de Bruut,
De Köstgäst stöw'n to'n Huus henut,
Dat Kindken weer verswunnen. –
Naast hett de Schult in'n Mählenbeck,
In'n Boomlock un de Kellereck
De Kinnerlieken funnen.

Gottlieb Müller-Suderburg