Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Swart Maleen

In 'n Dörperkroog bi Peter Bull,
Dor danzt de Knechten dull un vull,
As wenn de Danzbön breken schull,
De Deern in jümm ehrn Arm!

Musik! Musik! – Un Klarinett
Un Geig un Trummel un Trumpett,
De speelt, as gell dat hüt de Wett,
De ganze Welt to dreihn!

Man buten ünnern Boom alleen
In 't witte Hemd, up barsse bloße Been,
In 'n Maanenschien – un steit dor een?
Dat is de swart Maleen!

De höll dat nich in 't Krankenbett,
De repen Geig un Klarinett,
Un Trummel, Trummel un Trumpett!
Se müß to Danz, to Danz!

Keen kümmt dor op eer to so licht,
Den swarten Hoot deep in 't Gesicht?
He kickt hendaal un grött eer nich.
Maleen, de steit un beewt.

»Du kickst so liekenbleek, lütt Deern.
Dat is mien Farw, de hew ick geern!
Dien Hemp, dat schall mi nich scheneern!
Nu faat mi üm un danz!«

Musik! Musik! He grippt eer fast.
He bört in 'n Enn de lichte Last.
He dreiht eer rüm in hille Hast.
Musik! Musik! – un danzt.

Musik! Musik! – Se much sick wehrn,
Alleen se danzt so geern, so geern.
He sleit den Arm so fast üm eern.
Musik! Musik! – Se danzt!

He bögt sick daal un snackt vun Bruut
Un danzt mit eer ut Duster ruut
Un midden rin in't Tamm un Tuut
Vun Trummeln un Trumpett!

Musik! – – – Musik! – Wat is denn dat?
De ganze Saal is dusterswatt,
Un liesen is't, du kunnst een Katt
Op Poten slieken hörn.

Een Schri op eenmal, schrill un luud,
As föhr een Seel ut Lief heruut!
Un deep un dump: »Adjüs, lütt Bruut!«
Un ielig klappt een Döör.

In 'n Dörperkroog bi Peter Bull –
Dat heet, dat dat dor spöken schull.
De swart Maleen, de danz as dull
Dor in de duster Nacht.

Hermann Claudius