Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Stoffel

Maak mi ni dull! –
Swieg still! – De Oll ...
Laat de Oll in Freden, hew ick seggt;
He is mien Vadder, Deern.

Wat seggst du doar? –
Vörleeden Joar ...?
Bün ick ni richtig west in'n Kopp,
Dat schullst du likers weten.

Un nu? Je nu,
Du büst mien Fru.
Un de Jung, dat Kröt,
Welkeen weet,
Wo de heet,
Den dat Aastüg tohürt.
Un de schall hie Buur wesen?

De Oll het keen Für
In'n Aben hat
Un keen Eeten in'n Pott,
Un du straakst de Katt
Un kiekst na den Jung inne Weeg
Un na de Swolk, de eer Nest
Ünner de Grootdör buut het.

Met de Meßfork stöt ick 't daal.

't is Fierabend,
Nu ward dat Tied,
Geschichten to vertellen.
Ick weet ja,
't sünd olle Kamellen –
Man du schallst dat ni vergeten.

De ole Fru,
De se in'n Diek
Mang Inten un Poggen
Funnen hebbt,
De is mien Mutter west.

Un wo is't met mien Broder gaan,
Wonem söcht he sien Brot?
Un de lütte Deern
Met de gelen Hoar,
De weer je no' hie
Vörleeden Joar...?
Wonem is mien Swester nu?

Un wonem warst du wesen
Tokamen Joar?
Ick seh all de roden Ringelhoar
Mang't Gras up'n Karkhof wassen.
De Kulengräver meit't ni af –;
In'n Maanschien kannst du dar danzen.

Ick sla di dood –
– Versteihst mi ni –?

– – Kannst nu verstahn?

De Steed is leddig,
Un ick kann gaan.

– Versteihst mi nu –? –
De ole Fru
In'n Diek kann ruhig slapen.

De Köh un de Peer,
Hie waakt nümms mehr,
Un de Oll, de slöpt inne Stuuw.
Man de Maan, de schuult
Dör'n Boom anne Dör ...

Hie brukt he ni rintokieken! –

Wat ick bruuk, dat finn' ick in Dusternis all.
Wonem se liggt, pedd ick likers ni hen:
Blödig Föt will ick ni hemm'n.

Den olen Nagel,
Den kenn ick lang,
Un üm'n Strick
Is mi ni bang.

So 'n lütt Stück Dings,
Dat find sich schon.
De Kulengräver
Kriggt sien Lohn – – –
– Man bi eer – dar will ick ni liggen.

Dat ward de Mann ja wull weten.

Luise von Brockdorff-Ahlefeldt