Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

In 'n Fischerkroog

De Westwind huult an'n Fischerkroog.
Een hagern Speler mit gelen Pull,
De rode Kröger, een dunen Buur,
Sitt stief tosaam un grölt vördull.
Lütt Anneken bi de Toonbank vörn,
Lacht ok un will een Ledeken hörn.
Een Ledeken hörn.

De Gele langt na eer un lacht,
»Drei di, lütt Deern, drei di, lütt Katt,
Man loos, hest ok keen'n Prins in'n Arm,
Een Mannskerl bün'k, un speel di wat,
Ik speel di wat vun Brögam un Bruud,
Wi danst noch hüt öwer'n Drüssel ruut.
Den Drüssel ruut. Paß op!«

Lütt Anna lacht un pliert em to,
He bört de Figel un pett den Takt.
»Dor weer maal 'n Prins mang de Fischers born,
De Prins, de hett sik as Bestmann plakt.
He söch sien Bruud bi de Fischers bi,
De blanke Hans, de günn em dat ni.
De günn em dat ni!

Lütt Anna hett um den Prinsen weent,
Hett allns sien Tied, hört allns maal op.
Ik bring mien Warw mit der Figelien
Drei di, lütt Popp, drei di, lütt Popp!
Dien Prins, de an de Ruten ritt,
Hett hüt keen Takt, de kümmt ni mit.
Kümt hüt ni mit!

Dien Prins, de sitt in'n West to flenn,
De Nordsee harr een legen Rügg,
Hüt danst sien Deern mit mi um'n Disch,
De Bülgen geewt keen Doden trügg.
Dat Lewen ritt den Dood sien Recht,
Hüt bin ik Baas, de Prins is Knecht.
Is Knecht, juchhe.«

He jucht un danst, – 'keen klopt an't Huus?
De Blangdör kriescht, de Ampel blaakt,
Un glöt doodwitt, een barten Keerl
Dreit sik in'n Takt un lacht verspaakt,
Un dreit de Deern, – dat Lied hölt stopp,
De fochte Wind lacht luudhals op.
Huhee!

He danst um'n Disch, danst in de Dör,
De Drüssel lekt, as sprütt de See,
De Figel sakt, denn kriescht een Deern,
So greesig as een Dodenschree.
Een Paar danst ruut, de Gäst alleen,
Hett keen lütt Anneken wedderseen.
Keen een eer wedderseen.

Hans Friedrich Blunck