Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

De graute Uhre in 'n Mönstersken Doom

In 'n haugen Doom eene Uhre steit
To Mönster siet Uräollerns Tieden.
So hadde de Perpendickel geit,
De Klang wiet weg düor 't Gewölbe schreit,
Man hört em all stüenen van wieden.
Et lütt so dump, so luut un stuur,
Et geit un schreit in eene Tuur:
                  Ümmer – nümmer ...
Ümmer moßt lieden du Höllenpien,
Nümmer drafst du in den Hiemmel sien,
                  Ümmer – nümmer ...

Dao schleek een Mann met een bleek Gesicht –
Van Fuoren un Follen Furchen und Falten terrieten –
In 'n Doom; duukt sick bi den Bichtstool dicht,
He mök so gärne dat Hiärt sick licht,
Et lött em nich ruun sien Gewietten.
He sitt dao un hört up den Dubbelschlag,
De rüettelt em de Gedanken wach:
                  Ümmer – nümmer ...
Ümmer moßt lieden du Höllenpien,
Nümmer drafst du in den Hiemmel sien,
                  Ümmer – nümmer ...

In 'n Bichtstool schleek he sick hunnertmaol,
In alle Kapelkes un Kiärken;
Se frätt em dat Hiärt af, de Höllenquaol;
Män he, de süß so frech un predaol, brutal
He kann van sien Doon dann nich spriäken.
So sitt he auk hier nu all stunnenlang
Un häört, wat dat Gankwiärk so schurig sang:
                  Ümmer – nümmer ...
Ümmer moßt lieden du Höllenpien,
Nümmer drafst du in den Hiemmel sien,
                  Ümmer – nümmer ...

Et schläöpert em in. – He draimt so schwaor
Van dat, wat em quiält all siet Jaohren,
He denkt an den Falscheed, den he schwuor,
Un wu sien Naober 't Liäben verluor,
An all de Sünnen, de schwaoren.
In 'n Draum kürt halfluut he van siene Sünn',
Daotüsken in eensweg geit 't här un hin:
                  Ümmer – nümmer ...
Ümmer moßt lieden du Höllenpien,
Nümmer drafst du in den Hiemmel sien,
                  Ümmer – nümmer ...

Up 'n maol schlött de Uhre – in Daudesnaut
Schreit hellup de Kärl düör de Hallen:
»Ick häb et daohn, jau, ick schlaog em daut,
Sien Hiärtbloot fluot so raut, ao, so raut,
Nu laot 't mienen Kopp auk män fallen!«
Se hollen em fast – se schluotten em dicht –
Wu sall di dat gaohn bi dat jüngste Gericht?
                  Ümmer – nümmer?!
Ümmer moßt lieden du Höllenpien,
Nümmer drafst du in den Hiemmel sien,
                  Ümmer – nümmer?!

Eli Marcus