Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

De Danzprinzessin

Et fülln dree Steerns vun 'n Hewen heraf,
Se fülln wul upp eenes Königes Hof.

Do störwen den König sien Döchder dree,
Do repen de Lüde wull Ach un Weh.

De eene, de störw, as de Sünn uppgüng,
De tweete, de störw, as se to Middag stünn,
De drütte, de störw, as se to Rüste güng.

De eene, de kreeg wull een Rosenbusch mit,
De tweete, de kreeg een Nägelstrusch mit,
De drütte, de kreeg een Reep Tau üm de Hann.

Se gungen den Weg na'n Hewen henlang,
Do keem eer to Möte een witt witte Mann,
De hadd den Herrn Jesus sien Kleeder an.

Do sprök de Mann: »Neem wüllt ji up to?«
»Wi wüllt ingaan in de himmlische Roh.«
»Denn dörst ji ni stillstaan, denn gaat man to,
Dar güntsietgünt is de himmlische Roh.«

Do keemen se an een groot groot Dör,
De twee füllen in de Knee darvör.
De drütte mit eer tosaambunn Hann',
De bleew darvör staan un kloppde an;
Do hedd Sünte Peter de Döer uppdaan.

De mit de Rosen, de leet he in,
De mit Nägeln, de keem ok 'rin,
De drütte mit den Reep üm de Hann
Bleew buten vör de Dör bestaan.

»Ach Petrus, wat heff ik to Leede di daan,
Dat ick mutt vör de Döre staan?«
»Ga wieder, ga wieder, ga links hendaal,
Dar geit de Weg to de hellische Qual.«

»Den Weg, den ga ick nümmer un nümmer,
Ick höre doch ni to de legen schlimmen Sünner.
Ach Petrus, laat mi so lange nich staan,
Wat heff ick groot vör Sünden daan?«

»Wenn de annern wull in de Kerke weren,
Hest du danzt mit junge Kavaleren;
Wenn de annern to Bicht un Abendmahl gungen,
Hest du mit höfesche Lüde rumsprungen.«

»Un wenn ick gaan bünn to Speel un Danz,
Dat doot ook de Engeln in 'n himmlischen Glanz.
Laat mi mit den Herrn Christus spreken,
Van em will ick mien Oordeel weten.«

Do hedd sick wedder de Dör uppdaan,
Do hedd vör eer de witte Mann staan.
»Ach Jesus, wat heff ick Böses daan,
Dat ick mutt na de Höll ingaan?«

De nehm he eer dat Band vun de Hann,
Do is se ok in den Himmel ingaan.

Volksballade