Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Der Bauer nach der Kur von Wiesbaden

Von Friedrich Lennig

Wie bei em greeschte Feier uff em Hard
Quorrelt und brotzelt dort des Wasser aus der Ard.
Des is d'r e Gekoch und e Gegähr,
M'r sollt net maane, daß es Mensche mihlich wär.
Was mah do drunne sein? ze grawe härr eich Luscht,
Wann's aah die Hell net is, es is in kaam Fall juscht.

Die Hauptsach awwer is der Kursaal, dodruff halle
Die Leit gewaltig viel, meer hot er net gefalle ...
Der Saal is gruß un kann viel Batze koschte;
Er ruht uff acht un zwanzig staanern Poschte.
Deß sein zeviel, in meiner Scheier stieht nor aaner,
Dar trägt genung; freilich, die es e gut Daal klaaner.
De Borrem reiwe se dort als met Bettstreich ein,
Daß m'r hibsch falle kann un daß er glatt soll sein.
Die glasern Dhere dhun grad uff enanner ziehe;
Wamm-mer'sch Gicht noch net hot, dann kamm-mer'sch do noch kriehe.
Noch ebbes; denkt emol uff baade Seite –
Eich hunn mich drum befroht, 's sein Getze vun de Heide –
Stiehn d'r su Statewa vun weißem Marmelstaan;
nix um hunn die, fui Deiwel, un nix an.

Vom gruße Saal do gieht mer in die Newestubb,
Do sein die merschte Leit und spiele uff aam Trupp.
Dort hunn se uff em Disch su e rund Ding im Spiel,
Deß leeft erum wie's Rad an-ere Kaffeemihl.
Wie's is, deß waas eich net, eich glaab, 's sitzt aaner unne,
Und wo des Kihelche hinleeft, dar hot gewunne.
Dort fliehe die Karlin im Aaheblick ewek,
Bald hin bald har, m'r maant, des Geld wär Dreck,
Do mache, die verleern, Gesichter wie e Bauer,
Wann 's Hußje zu em kimmt, ganz deiwelmäßig sauer.
Wamm-m'r vorhar wißt, wie dar Klicker fällt zuletzt,
Hätt unseraans emol for Spaß aah druff gesetzt.
Weil awwer kaaner waaß, ob ar gewinnt, do docht eich:
Der Hunn-eich is mer doch noch liewer als der Hätt-eich.

Des Spiel ze Wißbad gieht in aam Stick fort, aan Leier.
Gleih vor em Kursaal is e großer hibscher Weiher;
Dort kumme Sunndahs Gäscht aus alle Ecke
Un schneire Kumplemender zum Verrecke.
Un dhun was vornehm, aans dem annern um die Wett,
Als wann e jedes Geld volluff ze fresse hätt.
Die treiwe d'r vun aans bis in die Nacht ehr Wese,
Die merschte kumme an un fahre fort mit Chaise.

Ehr Leit! Wann d'r noch net im Wißbad wart,
Gieht hin, aanmol ze siehn is es der Mih doch wart.
Naun war eich dort, un hott's aach nix gebatt,
Säht m'r im Sprichwort, no, do hot's aach nix geschadt; –
Ja scheen. – Mein Knolle Geld war fort in aaner Woch,
Die Knolle vun meim Gicht, adjees, die hunn eich noch.