Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

De Katt, de seet in'n Neddelbusch!

De Katt, de seet in'n Neddelbusch,
In'n Neddelbusch verborgen,
Dar keem dar'n lüttjen König an,
Un bo' ehr »guden Morgen!«

Dar dach de Katt, den fangst di gau
Un schast di'n smecken laten!
Se hau na em mit scharpe Klau,
Doch kreeg se'n ni to faten!

Un öwer ehr sung ut den Busch
Vergnögt de lüttje König,
Un leet dar op de Näs' vun Musch
Wat fall'n, un gar ni wenig!

He sung: Slickt't af, dat is för di
Un ock wat Sötes twischen!
Un wenn di't smeckt, denn denk an mi,
Un kannst de Näs' di wischen!

Jungs, holt fast!

Is dat nich en schöne Saak
Um uns' ol' leev Modersprak?
De so hartlich fram un tru.
So ahn' Stolt op Du un Du,
Ock noch hüt för Veele paßt?!
Jungs, holt fast!

Röhrt se nich uns Ol'n dat Hart,
Als wenn't noch mal Vörjahr ward?
Kriggt se nich an Moders Bost
Mit de Melk, als eerste Kost,
Pöppen all, de leev lütt Gast?
Jungs, holt fast!

Weer dar een, de spöttisch meen:
Plattdütsch is bi Licht besehn,
Doch man platt un ordinär,
Paßt un schickt sick ock ni mehr!
Lat sin Dünkel, den Hansquast!
Jungs, holt fast!

Weer all malinst baben an,
Harr de Tögel in de Hann,
Seet dar op'n Richterstohl,
Weer dar Bruk in Kark un Schol!
Sülb'n bi'n König in'n Palast!
Jungs, holt fast!

Wat liggt ock nich all'ns darin
För den rechten Mann to finn!
Kannst man mal de Dichters frag'n,
De mit teht an ehren Wag'n,
Parlen, dat di wunnern schaßt!
Jungs, holt fast!

O, du lüttje Buerndeern,
Als dar schöner noch keen weer'n,
Nich vun Harten un Gesicht!
Ock ehr hochdütsch Süster nich!
Hegt un plegt ehr sunner Rast!
Jungs, holt fast!

Komp.: 4 st. von L. Jessel, 4 st. von Cl. Serpenthien.

*