Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Hans-Narr

Dar geiht he hen, – de Strat hendal;
Ick kenn em noch als Jung,
Wo mank de Flicken mennigmal
Dat Hemd herut em hung.
Wa hett de Bengel sick in Wix
Vundag all wedder smeten!
Un »Lebensart! Hemd ut de Büx!«
Dat hett he lang vergeten.

Smeerleddern Steweln! – ei, bewahr!
De kennt he gar ni mehr;
Wixleddern sünd sogar to swar.
Lackeerte möt dar her;
Un smit se Fohln, – der Deuscher hal!
He kann de Schosters rüffeln!
Un slarr doch fröher mennigmal
Barfot in hölten Tüffeln.

Wa kunterbunt, wa sünnschienhell
De Büx, – wa stramm un schön!
Dat lett ja, als en Slangenfell
Um Swewelstickenbeen;
Un denn de Strippen nerrn an'n Rand!
Ja, wenn de Strippen reeten.
Denn gung de Büx bit't Strümpenband
Un würr en »Kneebüx« heeten.

De Steertrock redig himmelblau,
Un Knöp vun't gollen Slag;
Un denn Manschetten an de Mau,
En halben Fot för'n Dag;
Un achter ut den Steert herut
Wul öwer'n Ehl de Slippen
Vun't Taschendok, he kunn se gut
In't Rünnsteenwater stippen.

Sin lange Snurrbart gneterswart
Un ganz in'n Slängel dreiht;
Sin Haar vun Ölig blank un glatt,
Dat krüdrig rüken deit;
Vull bunte Blom de siden West,
Un Vadermörderspitzen,
Noch scharper, als en Slachtermess,
Se kunn'n de Näs' em ritzen!

Un denn de Hannschen – hunnblomgehl;
Un denn de Quast an'n Stock;
Un denn de Ked', – dar feilt ni veel.
So wiest he ok de Klock!
Un denn dat Glas an'n siden Band,
Dat he di brukt to kieken;
De Kerl, de hört in'n Adelsstand
Un söcht noch dar sin's Liken,

Nu süh, nu süh, wa he sick dreiht,
Un wackelt mit'n Steert!
Un dochen, als he geiht un steiht
För mi – keen Penning wert!
Ne, wat en Papagei, Herrje!
Vun Koppen bit to Föten;
Dar bögt he in de Lindnallee,
Nu möt wi uns bemöten.

Wat de wul is? – dat wüss ick geern;
Man sacht! – hier achter'n Bom
Verstek ick mi un will't probeern
Un frag em dör' de Blom.
Meck, meck! – meck, meck! – he kiekt sick um;
Meck, meck! – nu hüppt he wider; –
Wat gelt de Wett?! – tein Daler! – kumm!
De Bengel is – – en Snider.

*