Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

En Lüttjen un'n Glas Beer

Ja, twee un dree, – dat lat ick gahn,
Un veer kann ock wul noch bestahn,
Doch jo ni mehr, als veer!
Du lövst dat ni, wa gau dat geiht,
Dat di en fixen Wischer dreiht
En Lüttjen un'n Glas Beer.

Ick kenn so een, den kannst du sehn
Vun morrns bit abnds in'n Krog alleen,
Dar hett he sin Plaseer,
Dar fulenzt he den ganzen Dag,
Un jümmers geiht dat Slag för Slag:
»En Lüttjen un'n Glas Beer!«

Wa is de Näs' em kopperrot!
Wa lunkig un vull Bul'n de Hot!
Wa wackelt he verdweer!
Sin Tüg, – de Palten hangt daran,
Dat scheert em all nix, hett he man
En Lüttjen un'n Glas Beer.

He hett all mennig leewes mal,
Smeet em toletzt de Köm hendal,
Herumkleit op de Eer.
So kummt vör'n Hund de beste Mann,
Wat doch nich allens maken kann
En Lüttjen un'n Glas Beer!

To Hus, dar spelt he kasperat,
Smitt Pütt un Schötteln op de Strat
Un geiht darbi tokehr,
Als boller en Gewitter los,
Un dochen deit dat allns man blots
En Lüttjen un'n Glas Beer.

An't Prügeln is he all gewohnt,
Un geiht dat ock mal scheev un lohnt
Bischuerns düchtig Smeer,
Sin tweien Füst, sin dicke Snut,
De makt em nösten wedder gut
En Lüttjen un'n Glas Beer.

Bi den is alle Mögd' verlarn,
Sin Schaden un sin Fell vull Aarn
Gevt dochen em keen Lehr;
Wa dull he't makt, wa dull he't drifft,
Sin eenzig Wahlspruch is un blifft:
En Lüttjen un'n Glas Beer!

Dar liggt he nu un slöppt in'n Tun,
Wa is he wedder dick un dun!
De drinkt vundag keen mehr.
Mal still! – he snackt, – wat sä he dar?
Dat ole Swien! – he brumm förwahr:
»En Lüttjen, – un'n – Glas Beer!«

*