Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Min Olsch

Min Olsch is doch en Deuwelswiv!
Noch als en Perd, so wählig;
Se hölt sick stramm, se hölt sick stiv,
Un jümmers pük un fröhlich!
Och, Jung, un smitt se sick in Wix
Un pußt di ut de Kappen,
Du schullst ehr denn mal sehn, putz Blix,
Noch jümmers to'n Versnappen!

Un wat se kann – hör blots mal an,
Dat weet dat ganze Kaspel!
Se brakt un swingt, – se spelt di man
Mit Spinnrad un mit Haspel. –
Se wevt un knütt un stoppt un neiht,
Se backt un steiht to kaken,
Se melkt un karrnt, – un se versteiht
En Mannsbüx gar to maken!

Als ick ehr kreeg, ick harr min Not,
Ick weer ehr meist to flödig,
Se weer mi'n beten gar to grot
Un gar to öwermödig.
De Lüd, de sä'n ock forts: Johann,
O weh, de ward di rüffeln!
Paß op, se tüggt de Büxen an
Un sett di in de Tüffeln!

Ja, ja! de Lüd, de wussen't wul;
Ick kreeg min Deel to sappeln,
Un stunn ehr mal ni recht de Pull,
Denn harr ick nog to krappeln.
Hu, Deuscher! swull ehr denn de Prück,
Denn nöm se mi en Esel, –
Denn schimp se mi en Galgenstrick,
En Schinner un en Snösel!

Na, spelt se denn ock mal katholsch,
Dat hett nix to bedüden!
Se's likers doch min beste Olsch
Un blifft't för alle Tiden!
Un mutt ick ock mal mit pattu
Mi vör ehr bögn un kuschen,
So weet ick doch, ick heff en Fru,
De hett sick kämmt un wuschen!

Un nöm s' mi ock mal Galgenstrick,
Se lett mi doch ni lopen; –
Ick un min Olsch, – min Olsch un ick,
Wi beidn blivt doch tohopen!
Un makt se nöst, wenn't mal verbi,
Dat letzte Bett uns apen,
Ick bi min Olsch, – min Olsch bi mi.
So wüllt wi selig slapen!

*