Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Kattenjammer

Br! br! – wa bün ick jämmerlich!
Wa dösig un wa dämmerlich!
Wa deit de Kopp mi weh!
Weer güstern ni de Kinnerbeer? – –
Bi all min Ehr! ick weet't ni mehr,
Wadennig un wasück dat weer.
             O, Je!

Dat's recht! – ick mutt mi man besinn,
De Frunslüd snacken mi mit 'rin, –
Ick Esel, dat ick't de'!
Veel leewer in en Sack vull Dun,
Veel leewer mank de Imm in'n Tun,
Als mank en Swarm vun so veel Frun!
             O, Je!

Se harrn man so ehrn Spaß mit mi
Un sopen ut Plaseer darbi
Den Köm, als weer dat Tee!
Se kemn ock jümmers na mi 'ran
Un stötten jümmers mit mi an
Un schreegn: drink ut, drink ut, Johann!
             O, Je!

O, Je! wa kreeg ick dar en Brand!
Ick sack in'n Dutten an de Wand
Un knickel in de Knee.
Nöst heff ick stöhnt un prußt un speg'n –
Un als en Swien in'n Misten leg'n, –
Un watt för'n Kater heff ick kreeg'n!
             O, Je!

Ick mag ni lebn un kann ni starbn!
Dat schütt als Für mi dör' de Darm,
Als wenn en Mess drin snee'!
Un wa mi't vör de Ogen flüggt!
Un wa mi't dör' de Brägen tüggt!
Un wa mi't in de Knaken liggt!
             O, Je!

Den Hals verdrögt, de Tung verdorbn!
Ick krümm mi, als en Regenworm,
Un allens deit mi weh!
Nu bring mi man en solten Här'n,
Un hal en Buddel Solterbeern,
Sunst kann ick mi ni länger wehr'n!
             O, Je!

*