Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Snider

Nu kiek mi mal den Snider an,
Wa so'n Hans-Quast sick maken kann!
Hüpp, hüpp! – wipp, wipp! – flink, als en Rick,
So putzig springt dar sülbn keen Zick;
Wa krus un krall, wa pük un keck!
Nu kiek mi mal den Meister Meck!

Manschetten, Halsbinn, Dok un Rock
Un Hannschen, Uhrked', Hot un Stock,
Un Steweln, Linntüg, West un Büx
Is allns in'n allerbesten Wix;
Vun ünnern rop bit babn na'n Hot
De ganze Kerl na de Mod.

Dar günnert bi den Sickretär,
Dar sitt de Döchder vor de Döhr:
Fui Deuwel! – dat is ewig schad!
Dar brüggt se just en nie Strat;
Gesperrt!! – – keen Snider sperrt man ni!
En Snider hüppt bi allns verbi!

He mutt dar hen, se möt em sehn;
De bunte Büx, de smucken Been,
De krusen Haar, den glatten Rock,
De Uhrked' un den blanken Stock;
He dreiht den Steert, he smitt de Been,
He mutt dar hen! – se möt em sehn!

Wat scheert en Snider ock de Strat?
En Snider denkt man an sin Staat;
Un is dar 'n Deern, – un süht he't man,
So spelt de Snider Don Schuan;
Un denn? – na denn is nix to dull,
Wat nich en Snider wagen schull!

Süh, süh! – nu dreiht he jüst henlank.
De Deerns, de kichert op de Bank; –
He krellt den Bart, he schult um Eck
Un hüppt dar langs, – meck, meck! – meck, meck! –
Süh dar! nu is he lik darvör,
Jüst vör den Sickretär sin Döhr!

Ei, dat dar ock de Strat so slech!
Dar liggt en Steen jüst lik in'n Weg;
He snöckert; – – dat de Deuwel di!
He fallt! – – perdautz! – nu is't verbi!
Dar liggt he! – – de verdammte Steen!
Knack! – sä de Büx – un reet vuneen!

*