|
||||||||||||||
| Autoren | ∞ | Werke | ∞ | Neu | ∞ | Information | ∞ | Shop | ∞ | Lesetips | ∞ | Textquelle | ∞ | |
|
|
||||||||||||||
| Autoren | ∞ | Werke | ∞ | Neu | ∞ | Information | ∞ | Shop | ∞ | Lesetips | ∞ | Textquelle | ∞ | |
Anzeige. Gutenberg Edition 16. 2. vermehrte und verbesserte Auflage. Alle Werke aus dem Projekt Gutenberg-DE. Mit zusätzlichen E-Books. Eine einmalige Bibliothek. +++ Information und Bestellung in unserem Shop +++
Ick stunn in't Korn
Bit öwer de Ohrn
Un dach: hör mi
De Gottessegen!
Riept ock för di
Wul een vun de Wüppen,
Wer stunn in'n Regen
Un kreeg keen Drüppen?!
En Meter,
Min Peter,
Wat's 'n Meter?
Seggt Peter:
En Meter?
Ja, seh!
Is'n Peter
Mit'n M, statts'n P.
De arme Bur,
Wa hett he't sur!
Mit de Gabel in de Hann
In'n Grotvaderstohl,
Achter'n Disch vör de Pann
Vull Klütjen un Kohl,
Un en Stücker söbn
Vun'n duppelten Köm: –
De arme Bur,
Wa hett he't sur!
Vun Alt'na na Kiel
So twee vulle Dag
De veertein Miel
Reis' ick mal to Wag',
Un ick mark nix vun lange Wiel.
Vun Alt'na na Kiel
Mit de Isenbahn
So de veertein Miel,
In dree Stunn weer't da'n,
Un dar sleep ick vör lange Wiel.
Vun Alt'na na Kiel,
Würr de Büx ni schav,
Rutsch de veertein Miel
Langs'n Telegraph:
Un du jappst noch vör lange Wiel.
En Piep Toback,
En Mundvull Snack,
En Lüttjen un'n Glas Beer, –
Dat weer so alle Dag sin Smack,
Als he noch recht wat weer.
En Piep Toback,
En Mundvull Snack,
En Lüttjen un'n Glas Beer: –
Nu geiht he in de tweie Jack
Un hett keen Penning mehr.
Dat weer en Fest, de Kinner harrn
Ehr Vagelstang dar buten;
Lüttj' Petje wull geern König warrn,
Schot Nawer in de Ruten,
Un als em nu de Jungens narrn,
Wa fung lüttj' Petje an to blarrn,
Wa wurr de Kopp em glönig!
Lüttj' Petje wull geern König warrn,
Nu weer he Rutenkönig.
Komp.: 4 st. v. Cl. Serpenthien, 1 st. v. C. Reinecke
Klas Klaßen sin Klas
Dat is di en Baas!
He schot na en Has'
Un drop de Koh;
Dar schreeg he: Ho!
Wa springt dat Aas!
Dat makt ehr Spaß,
Dat ick drop den Has!
Vör de Neddeln an'n Weg
Heff ick stillstahn un seggt:
Ju nützt doch gar nix op de Welt
Un hebbt jüm hier in'n Graben stellt,
To wuchern un to prassen?
Ju künnt ja wider nix, als brenn,
Woto lett ju uns' Herrgott denn
So wälig diehn un wassen?
Un de Neddeln an'n Weg
Hebbt mi utlacht un seggt:
Snicksnackeri! wat rödelst du!
Sühst du dar ni de Lüttmannsfru?
Se hett sick Neddeln reten;
Se hett en Swien un'n Pöckeltunn,
Un harr se ni de Neddeln funn,
Wat schull dat Swien denn freten?
Bi Hansohm geiht dat nu all lang
So alle Dag in'n vullen Gang,
Un kann ol' Hansohm ni bestahn,
So liggt dat seker nich an't Gahn.
Sin Olsch geiht op de Nawerschap,
Sin Dochder geiht noch mit de Popp,
Sin Söhn geiht mit de Piep in'n Stall,
Sin Arbeitsmann geiht achter´n Wall,
Sin Köksch geiht in de Krinolin,
Sin Knecht geiht in de Kök to frien,
Un in de Dönsch, dar geiht de Dei,
Un Hansohm geiht de Büx entwei,
Un Hansohm sitt un neiht un deit
Un freut sick, wa dat prächtig geiht.
De Has'! de Has'!
Dat weer en Spaß,
Harrn wi em kregen!
Dar löppt he, Klas! –
Un hier hett he legen!
Ick seet an'n Disch un schreev un damp,
Dar flog en Mott mi in de Lamp,
Un als se dod weer, heff ick schreben:
Du arme Mott,
Nu büst kaputt;
Du keemst to dicht
An't helle Licht,
Un datt verdriggt
De Motten nicht;
Weerst du man smuck in'n Düstern bleben.
Denn weerst du seker noch an't Leben!
Nu süh mal an, dat arme Perd,
Dat mutt dar slimm hindör'!
So'n Hupen Schiet is ock wat wert,
Se quost em man eerst mör;
Nöst fangt de Backers an mit Fliet
Un röhrt de Hann un Been
Un makt di ut de Hupen Schiet –
De schönsten Tegelsteen.
Op Rang un Stand kummt't nümmer an; –
Ob König oder Arbeitsmann:
De Hauptsak is, dat jeder deit
Sin Plicht, in wat för'n Stand he steiht.
En Giezhals, – slimmer nix als dat,
Un wenn't de Düwel sülben weer!
Son Hungerlider ward ni satt
Bit em dat Mul ward stoppt mit Eer!
Bischuerns geiht mi't ock mal leeg,
Wakeen harr ni sin Leid un Plag? –
Doch wenn ick di so krupen seeg,
Denn denk ick an min guden Dag
Un freu mi denn, du lütte Rup,
Dat ick ni so, als du, dar krup.
Juchhei! Juchhei!
Wa ick mi freu!
Vunnacht keem Lischen Allerlei!
Nu ward dat grön!
Nu ward dat blöhn!
Nu springt dar alle Knuppens twei!–
Juchhei! Juchhei!
Wa ick mi freu!
Gu'n Morrn, lüttj' Lischen Allerlei!
Gu'n Morrn, Herr Mai!
*