Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Op'n Höhnerhoff

Tuk, tuke! – tuk, tuk!
Kummt se, de Olsche, un kluckt;
Ne, wat en Lust to sehn!
All de lüttj' flinken Been;
Lopt se un snötert un piep':
Tip, tipe! – tip, tip!

Kik – kikeri – ki!
Süh den Hans-Quast mi mal, süh!
Brüst sick un steiht un kreiht.
Selig vör Vaderfreud,
Lat ock en beten för mi!
Kik – kikeri – ki!

Kurr – ruu! – kurr – ru!
Klapp! sä't de Flünken, un hu!
Jagt se di alltomal
Baben vun't Dack hendal,
Düffer makt Mantjes, bu! bu!
Kurr – ruu! – kurr ru!

Wat, watte! – mal, wat!
Kamt ock de Pritjes an't Fatt;
Gehl, als en Suckerplumm;
Plumps! – in de hölten Kumm
Palscht se – un snappelt sick natt;
Wat, watte! – wat, wat!

Husch, husche! – husch, husch!
Kamt ock de Vageln vun'n Busch;
Spatz hüppt in'n vullen Sprung;
Spatsche ock mit ehr Jungn
All achteran mit Geschri
Mi, mimi! – mi, mi!

Wipp 'röwer! – wipp, wipp!
Snawel in't Water 'rinstipp;
Makt ja den Hals so lang,
Sä't wul uns' Herrgott Dank.
Drinkt, – holt tohöch de lüttj' Nipp;
Wipp rünner! – wipp, wipp!

Du, dudu! – du Lünk!
Düffer kriggt Spatz bi de Flünk;
Spatz weer ock gar to slech,
Stohl em't vör'n Snawel weg;
Rapps! – fleegt de Dun ut de Flünk:
Du, dudu! – du Lünk!

Pick, picke! – pick, pick!
Jeder am dullsten för sick;
Hier mal un dar mal hin,
Grüttkorn in'n Snawel 'rin;
Vullpruppt, – un kugelrund dick;
Pick, picke! – pick, pick!

Wau, wauwau! – wau, wau!
Hurrr! – wat en Larm! – un wa gau!
Hier hen un dar hen flagn.
All utenanner stabn, –
Un – op de Steenbrüch um'n Swanz
Jalpt Filax un danzt.

*