Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

In de Wisch

In de Wisch,
Mank de Büsch,
Mank de Hümpels vun Hau,
O, wa schön!
O, wa grön!
Un de Heben, wa blau!
Wo du geihst.
Wo du steihst,
Wa dat levt, wa dat lacht!
O, wa bunt
Op'n Grund!
Un en Pracht! un en Pracht!

Dör' de Wulk
Jagt de Swulk,
Un de Iritsch, de röppt;
Un in'n Bek
Palscht de Hek,
Un dat Water, dat löppt!
Un de Imm
Swarmt herüm,
Un de Grashüpper springt;
Un in Blöt
Steiht dat Ret,
Un de Lurken de singt.

In de Wisch
Mank de Büsch,
Mank de Hümpels vun Hau,
O, wa schön,
O, wa grön!
Un wa leevlich de Rau!
O, wa veel,
Rot un gehl,
Blau un witt in de Feern!
Nix as Blom;
Un in'n Bom
Lett de Kukuk sick hörn.

Ünner'n Tun
Kannst du ruhn,
Brummt de Hummel in't Moos;
Hangt de Nöt,
Vör de Föt
Waßt de Sötblom un Ros';
Wat en Bett!
O, wa nett!
Öwer Bläder un Blöm,
Ünner'n Tun
Kannst du ruhn.
Kannst du dichten un drömn.

Kamt de Grilln,
Muss se stilln;
Kamt de Sorgen so swart,
Gah man 'rut,
Deit di gut,
Smödt di Bossen un Hart.
In de Wisch
Mank de Büsch,
Mank de Hümpels vun Hau,
O, wa schön!
O, wa grön!
Kumm man gau! Kumm man gau!

Komp.: 1 st. v. C. Reinecke. 1 st. v. L. Jessel.

*