Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Nawerschap

Gudn Abend, Nawer Krischan! – nu sett di man, du!
Wat makt din lütt Jung denn? – wa geiht't mit din Fru? –
Vunabnd is dat schön un hier buten in de Luv
Doch dusend mal beter, als dar binn in de Stuv.

Dat schull ick man meen'n! – wa's de Luft rein so warm!
Wa spelt di de Sewwers un de Mücken in'n Swarm!
Dar kummt ock de Mand rop un pliert dör' de Böm,
Un lis' piept de Vageln un sitt all to drömn.

Un wi – sitt to smöken! – wa söt rükt de Bom!
Wa witt schien den Stig dal de Seddelröschenblom!
Un günd de Kaneelbüsch bi'n Grashoff in'n Tun, –
Dat is di en Rükelsch, dat makt een ja dun!

Kiek günd mal heröwer, dar achter na'n Bek!
De Voß stickt de Näs' rut un brut för de Wek;
Als keem dar de Flot her un gung dör' de Wisch,
Als stunn dar in't Water de Bom un de Büsch.

Wat's dat?! – ei, der Deuscher! de Nachtigal sleit;
Wa trurig, wa smuck un wa lisen dat geiht!
Nu hör mal, wa lustig! – wa lud un wa dull! –
Still is se! – – de harr den lütt'n Snawel mal vull!

A, kiek mal dar babn rop, wa steil se sick hölt,
Fru Adbar, op't een Been un kiekt in de Welt
Un lett vun de Pögg sick ehr Livstückschen singn
Un lurt, wat vunabnd wul de Mann ehr schull bringn.

Dar kummt he! – dar sust he heröwer! – husch! – husch!
De Spitzbov! dar kiek mal! – en Bult un en Busch!
Nu klappert, – nu bedt se, – nu stiegt se in't Nest; –
Slap sund. Marten Hinnerk! – to Bett is dat Best'!

Gudn Nach, Nawer Krischan! – Du büst gar ni dumm,
Een Hand wascht de anner! – dat nehm mi ni krumm!
Du bust dar vun't Vörjahr dat Nest hen für ehr, – –
Un se, –– bröchen dör'n Schosssteen di den Schrighals daför! –

*