Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Gottfried von Straßburg

Tristan

« nein vrouwe. « Isôt diu rief: « ôwê
und wâfen dirre maere!
unsaeligen mordaere,
waz habet ir an gegangen?
ir müezet beide hangen! «
« hêrre « sprâchen jene dô
« wie lûtent disiu maere sô?
vil wunderlîchiu vrouwe Isôt,
ir habet uns doch mit maneger nôt
ervlêhet unde benoetet,
daz wir si haben ertoetet. «
« ine weiz, waz ir von vlêhe saget.
ich bevalch iu mîne maget
in iuwer huote und iuwer pflege,
daz ir ir pflaeget ûf dem wege,
dâ sî mir solte bringen
ein teil ze mînen dingen.
die müezet ir mir wider geben
oder ez gât iu an daz leben.
ir veigen mortslangen
ir werdet beide erhangen
oder ûf einer hurt verbrant! «
« Entriuwen « sprâchen jene zehant
« vrouwe, iuwer herze und iuwer muot
diun sint niht lûter unde guot,
iuwer zunge ist harte manicvalt.
nu vrouwe, vristet disen gewalt.
ê wir verliesen unser leben,
wir wellen s' iu ê wider geben
schoene unde wol gesunde. «
Isôt sprach an der stunde
weinende harte sêre:
« nune lieget mir niht mêre.
lebet Brangaene ald ist si tôt? «
« si lebet noch, wunderlîche Isôt. «
« ôwê, sô bringet mir si her
den worten, daz ich iuch gewer,
swes ich iu gelobet hân. «
« vrouwe Isôt, daz sî getân. «
Isôt behabete ir einen dâ.
der ander reit dannen sâ
hin wider, dâ er Brangaenen lie.
Isôte ir vrouwen brâhte er die.
und dô si vür Isôte kam,
Isôt si zwischen arme nam
und kuste ir wange unde ir munt
ze einer und ze maneger stunt.
den zwein gab sî ze solde
zweinzec marc von golde
den worten, daz diz maere
von in verholen waere.
Nu daz diu küniginne Isôt
Brangaenen in der endenôt
getriuwe unde staete
und an ir muote haete
durnehte in alle wîs bekant
und in dem tegele gebrant
unde geliutert alse ein golt,
sît des was Brangaene unde Isolt
von herzen und von sinne
sô getriuwe und sô geminne,
daz nie niht under in beiden
ir dinges wart gescheiden.
si wâren mit ein ander dô
ir muotes unde ir herzen vrô.
Brangaene was des hoves dô wol,
der hof der was ir lobes vol.
si was geminne in allen.
sine truoc niemanne gallen
ûzen noch innerhalp der wât.
si was râtgebe unde rât
des küneges unde der künigîn.
ze kamere kunde niht gesîn,
Brangaene enmüese ez wizzen.
ouch was sî vervlizzen
ze dieneste Isolde.
si diende ir, swie si wolde,
an Tristande ir amîse.
daz triben s' alse lîse,
daz nie nieman dervan
dekeinen arcwan gewan.
ir gebaerde, ir rede, ir maere
oder swaz ir dinges waere,
des nam in lützel ieman war.
nieman haete wân dar.
in was sanfte und alsô wol,
alse zwein gelieben sol,
den ir state unde ir zît
ze staten und ze willen lît.
dâ was amîe unde amîs
alle zît und alle wîs
in der minnen bejage.
si begunden dicke in dem tage
ir ougen understricken
mit inneclîchen blicken
in der menege und under liuten,
dâ blicke sulen tiuten
und wehselmaere meinen,
mit den man sich vereinen
aller gelieben liebe mac.