Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Gottfried von Straßburg

Tristan

ric unde gorgen sneit er sâ
obene, dâ diu brust da want.
daz houbet lôste er al zehant
mit dem gehürne von dem cragen
und hiez daz zuo der brüste tragen.
« nu wol her balde! « sprach er z' in
« nemt balde disen rucke hin!
kome ieman armer liute her,
der es geruoche oder ger,
dem teilet disen rucke mite
oder tuot dermite nâch iuwerm site.
sô mache ich die curîe. «
dar gie diu cumpanîe
und nâmen sîner künste war.
Tristan hiez im bringen dar,
daz er im ê bereiten bat.
nu daz lac allez an der stat
wol gemachet unde bereit,
als er in haete vor geseit.
nû wâren der quartiere
von dem herzen viere
vier halben ûf die hût geleit
nâch jegelîcher gewonheit
und lâgen ûf der hiute alsô.
milz unde lungen sneit er dô,
dar nâch den panzen unde den pas
und swaz der hunde spîse was,
in alsô cleiniu stuckelîn,
als ez ein vuoge mohte sîn,
und spreite ez allez ûf die hût.
hie mite begunde er überlût
den hunden ruofen: « zâ zâ zâ! «
vil schiere wâren s' alle dâ
und stuonden ob ir spîse.
« seht « sprach der wortwîse
« diz heizent sî curîe
dâ heime in Parmenîe
und wil iu sagen umbe waz.
ez heizet curîe umbe daz,
durch daz ez ûf der cuire lît,
swaz man den hunden danne gît.
als hât diu jegerîe
den selben namen curîe
von cuire vunden unde genomen.
von cuire sô ist curîe komen.
und zwâre ez wart den hunden
ze guoten dingen vunden
und ist ein guot gewonheit,
wan swaz man in dar ûf geleit,
daz ist in süeze durch daz bluot
und machet ouch die hunde guot.
nu sehet an disen bastsite,
da enist kein ander spaehe mite.
nemt war, wie er iu gevalle. «
« â hêrre! « sprâchen s' alle
« waz seistu, saeligez kint?
wir sehen wol, dise liste sint
bracken unde hunden
ze grôzen vrumen vunden. «
Aber sprach der guote Tristan:
« nu nemet iuwer hût hin dan,
wan ine kan hie mite niht baz.
und wizzet waerlîche daz,
kund ich iu baz gedienet hân,
daz haete ich gerne getân.
der man der houwe sîne wit
und widet ûf sunder iuriu lit.
daz houbet vüeret an der hant
und bringet iuwern prîsant
ze hove nâch hovelîchem site.
dâ hovet ir iuch selben mite.
sô wizzet ouch ir selbe wol,
wie man den hirz prîsanten sol.
prîsantet in ze rehte! «
den meister und die knehte
die nam aber dô wunder,
daz in daz kint besunder
und mit bescheidenheite
sô manc jagereht vür leite
und daz ez sô vil wiste
von sus getânem liste.
« sich « sprâchen sî « saeligez kint!
diu wunderlîchen underbint,
diu du uns vür zelst und hâst gezalt,
diu dunkent uns sô manicvalt:
wirn sehen sî noch baz z' ende gân,
swaz dû biz dâ her hâst getân,
daz ahte wir ze nihte. «
sus zugen s' ime enrihte
ein pferit dar und bâten in,
daz er durch sîne tugent mit in
nâch sîner kunst ze hove rite
und er si sînen lantsite
unz an ein ende lieze sehen.
Tristan sprach: « daz mac wol geschehen.
nemet den hirz ûf und wol hin! «
sus saz er ûf und reit mit in.
Nu s' also mit ein ander riten,
nu haeten jene vil kûme erbiten
der state unde der stunde.