Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Gottfried von Straßburg

Tristan

Tristan geneic den alten:
« ei « sprach er « dê benîe
si sainte companîe!
sus heilege geselleschaft
die gesegene got mit sîner craft! «
Aber sprâchen ime die zwêne zuo:
« vil liebez kint, wannen bist duo
oder wer hât dich dâ her brâht? «
Tristan der was vil wol bedâht
und sinnesam von sînen tagen,
er begunde in vremediu maere sagen:
« saelegen hêrren « sprach er z' in
« von disem lande ich bürtic bin
und solte rîten hiute,
ich und ander liute,
jagen ûf disem walde alhie.
do entreit ich, ine weiz selbe wie,
den jegeren unde den hunden.
die die waltstîge kunden,
die gevuoren alle baz dan ich.
wan âne stîc verreit ich mich,
unz daz ich gar verirret wart.
sus traf ich eine veige vart,
diu truoc mich unz ûf einen graben,
dane kunde ich mîn pfert nie gehaben,
ezn wolte allez nider vür sich.
ze jungest gelac pfert und ich
beidiu z' einem hûfen nider.
done kunde ich nie sô schiere wider
ze mînem stegereife komen,
ezn haete mir den zügel genomen
und lief allez den walt în.
sus kam ich an diz pfedelîn,
daz hât mich unz her getragen.
nu enkan ich nieman gesagen,
wâ ich bin oder war ich sol.
nu guoten liute, tuot sô wol
und saget mir, wâ welt ir hin? «
« vriunt « sprâchen sî dô wider in
« geruochet unser trehtîn,
sô welle wir noch hînaht sîn
ze Tintajêle in der stat. «
Tristan guotlîche sî dô bat,
daz sî 'n mit in dar liezen gân.
« vil liebez kint, daz sî getân «
sprâchen die wallenden man
« wil dû dâ hin, sô kêre dan. «
Tristan der kêrte mit in hin.
hie mite sô huop sich under in
maneger slahte maere.
Tristan der hovebaere
der was mit rede alsô gewar,
si vrâgeten her oder dar,
daz er des alles antwurt bôt
niwan ze staten und ze nôt.
er haete sîne mâze
an rede und an gelâze
sô wol, daz es die wîsen,
die getageten und die grîsen
ze grôzen saelden jâhen
und aber ie baz besâhen
sîne gebaerde und sîne site
und sînen schoenen lîp dâ mite;
sîniu cleider, diu er an truoc,
diu gemarcten sî genuoc,
durch daz si wâren sêre rîch
und an gewürhte wunderlîch.
und sprâchen in ir muote:
« â hêrre got der guote,
wer oder wannen ist diz kint,
des site sô rehte schoene sint? «
sus giengen sî 'n betrahtende
und allez sîn dinc ahtende
( diz was ir kurzewîle)
wol eine welsche mîle.
Nu kam ez in kurzer stunde:
sînes oeheimes hunde,
Markes von Curnewâle,
die haeten zuo dem mâle,
als uns daz wâre maere saget,
einen zîtegen hirz gejaget
zuo der strâze nâhen.
dâ liez er sich ergâhen
und stuont aldâ ze bîle.
im haete vluht und île
alle sîne craft benomen.
nu wâren ouch die jegere komen
mit michelem geschelle
hürnende zuo gevelle.
Tristan dô er den bîl ersach,
wider die pilgerîne er sprach
wîslîche, als er wol kunde:
« ir hêrren, dise hunde,
disen hirz und dise liute,
die verlôs ich hiute.
nu hân ich s' aber vunden.
diz sint mîne kunden.
gebietet mir, ze den wil ich. «
« kint « sprâchen sî « got segene dich.
ze saelden müezest dû gevarn! «