Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Gottfried von Straßburg

Tristan

dâ sîne reitgesellen mite
sô schône sint bereitet.
sus sî Tristan geleitet
ze hove und ouch ze ringe,
mit allem sînem dinge
sînen gesellen ebengelîch,
ebenziere und ebenrîch.
ich meine aber an der waete,
die mannes hant dâ naete,
niht an der an gebornen wât,
diu von des herzen kamere gât,
die sî dâ heizent edelen muot,
diu den man wolgemuoten tuot
und werdet lîp unde leben.
diu wât wart den gesellen geben
dem hêrren ungelîche.
jâ weizgot der muotrîche,
der êregire Tristan
truoc sunderlîchiu cleider an
von gebâre und von gelâze
gezieret ûz der mâze.
er haete s' alle an schoenen siten
unde an tugenden übersniten.
und iedoch an der waete,
die mannes hant dâ naete,
da enwas niht underscheidunge an.
des truoc der werde houbetman
in allen gelîche.
Sus was der muotrîche,
der voget von Parmenîe
und al sîn massenîe
ze münster mit ein ander komen
und haeten messe vernomen
und ouch enpfangen den segen,
des man in dâ solte pflegen.
Marke nam dô Tristanden
sînen neven ze handen,
swert unde sporn stricte er im an.
« sich « sprach er « neve Tristan,
sît dir nû swert gesegenet ist
und sît dû ritter worden bist,
nû bedenke ritterlîchen prîs
und ouch dich selben, wer dû sîs.
dîn geburt und dîn edelkeit
sî dînen ougen vür geleit.
wis diemüete und wis unbetrogen,
wis wârhaft und wis wolgezogen;
den armen den wis iemer guot,
den rîchen iemer hochgemuot;
ziere unde werde dînen lîp,
êre unde minne elliu wîp;
wis milte unde getriuwe
und iemer dar an niuwe!
wan ûf mîn êre nim ich daz,
daz golt noch zobel gestuont nie baz
dem sper unde dem schilte
dan triuwe unde milte. «
Hie mite bôt er im den schilt dar.
er kuste in und sprach: « neve, nû var
und gebe dir got durch sîne craft
heil ze dîner ritterschaft!
wis iemer höfsch, wis iemer vrô! «
Tristan verrihte aber dô
sîne gesellen an der stete,
rehte als in sîn oeheim tete,
an swerte, an sporn, an schilte.
diemüete, triuwe, milte
die leite er iegelîches kür
mit bescheidenlîcher lêre vür.
und enwart ouch dâ nimê gebiten.
gebuhurdieret unde geriten
wart dâ, zewâre deist mîn wân.
wie s' aber von ringe liezen gân,
wie sî mit scheften staechen,
wie vil sî der zebraechen E
daz suln die garzûne sagen:
die hulfen ez zesamene tragen.
ine mag ir buhurdieren
niht allez becrôieren,
wan einen dienest biute ich in,
des ich in sêre willic bin:
daz sich ir aller êre
an allen dingen mêre
und in got ritterlîchez leben
z' ir ritterschefte müeze geben!
Truoc ieman lebender staete leit
bî staeteclîcher saelekeit,
sô truoc Tristan ie staete leit
bî staeteclîcher saelekeit.
Als ich ez iu bescheiden wil:
im was ein endeclîchez zil
gegeben der zweier dinge,
leides unde linge.
wan allez daz, des er began,
dâ lang im allerdickest an
und was ie leit der linge bî,
swie ungelîch diz jenem sî.
sus wâren diu zwei conterfeit,
staetiu linge und wernde leit,
gesellet an dem einen man.