Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Gottfried von Straßburg

Tristan

nu wie bewar ich mich hier an,
daz ich der rede gewis sî? «
« vil wol, hêrre, ich hân hie bî
mînes hêrren vürsten alle.
swaz gewisheit iu gevalle,
die saget ir mir. diu ist getân,
die wîle und ich ir einen hân. «
Hie mite sô schiet der künic dan.
die vrouwen unde Tristan
die beliben aber eine dâ.
Tristan nam Paranîsen sâ.
« geselle « sprach er « gâ hin abe.
dâ stât ein kiel in der habe,
dâ ganc geswâslîche hin
und vrâge, welher under in
Curvenal dâ sî genant.
dem selben rûne zehant,
daz er ze sînem hêrren gê.
und sage ouch nieman niemê
und bringe in lîse, als höfsch du sîs. «
nu hêrre, daz tet Paranîs.
er brâhte in alsô lîse dar,
daz sîn nieman wart gewar.
nu s' în zer kemenâten
vür die vrouwen trâten,
im neic diu küniginne
und nieman mê dar inne.
sine nâmen sîn durch daz niht war,
er enkam niht alse ein ritter dar.
nu Curvenal Tristanden
den vrouwen under handen
vrôlîchen unde gesunden sach,
in franzoiser wîse er sprach:
« hâ bêâ dûz sire,
durch gotes willen, waz tuot ir,
daz ir sus wunneclîche
in disem himelrîche
sus lûzet verborgen
und lât uns in den sorgen?
wir wânden alle sîn verlorn.
biz iezuo haete ich wol gesworn,
daz ir niht lebende waeret.
wie habet ir uns beswaeret!
iuwer kiel und iuwer liute
die geswuoren wol noch hiute
und habent ez dâ vür, ir sît tôt,
und sint mit micheler nôt
her unze an dise naht beliben
und haeten daz in ein getriben,
si wolten hînaht hinnen sîn. «
« nein « sprach diu guote künigîn
« er lebet gesunder unde vrô. «
und Tristan der begunde dô
britûnsch sprechen wider in.
« Curvenal « sprach er « gâ balde hin
und sage hin nider, mîn dinc stê wol
und ich ez allez enden sol,
dâ nâch wir ûz sîn gesant. «
hie mite sô seite er ime zehant
sîne linge al von grunde,
so er ebeneste kunde.
nû er im haete geseit
sîn gelücke und sîn arbeit,
« nu « sprach er « balde, gâ hin nider.
sage mînen lanthêrren wider
und ouch den rittern dar zuo,
daz ir iegelîcher vruo
mit sînen dingen sî bereit
wol gestrichen unde gecleit
mit der aller besten wât,
die ir iegelîcher hât,
und nemen mînes boten war.
swenne ich in den sende dar,
sô rîten her ze hove ze mir.
ouch sende ich morgen vruo ze dir,
sô sende mir den cleinen schrîn,
dâ mîniu cleinoede inne sîn
und mîniu cleider dâ mite,
diu von dem allerbesten snite.
dich selben cleide ouch alsô wol,
alse ein hövesch ritter sol. «
Curvenal neic und kêrte dan.
Brangaene sprach: « wer ist der man?
in dunket waerlîche
hier inne ein himelrîche.
weder ist er ritter oder kneht? «
« vrouwe, swâ vür ir in geseht,
er ist ein ritter unde ein man.
dane habet dekeinen zwîvel an,
daz disiu sunne nie beschein
tugenthafter herze kein. «
« â, saelic müeze er iemer sîn! «
sprach ietwederiu künigîn
und mîn vrou Brangaene ouch dermite,
diu höfsche und diu wol gesite.
Nu Curvenal zem schiffe kam,
sîne rede ze handen genam
dâ nâch, als ime was vür geleit,
er seite in, alse im was geseit
und ouch wie er Tristanden vant.