'S Diendl hat die Kerschn gern,
Hat sei' Gfall'n dro',
Und die dumma Kerschnbaam
Schaugn s' gar nit o'.

'S Diendl hat die Bliemin gern,
Red't sogar damit,
Und die zupft'n Dinger da,
Die verstenga s' nit.

Und i' laaf zwoa ganzi Jahr'
Um dees Diendl scho',
Und sie fliegt, als waar s' a Fink,
Allewei' davo'.

Und i schaug so oft nach ihr,
Schaug mi' halbet dumm,
Sie macht's wie die Kerschnbaam,
Kimmert si' nix drum.

Und i red' so süß und fei',
Plag' mi' da und dort,
Thuat s', als wann s' a Bliemi waar,
Sagt ma nit a Wort.

Kimm' i wied'r amal auf d' Welt,
Woaß i, was i thua,
Werr a Fink, a Kerschnblüh
Ehnder als a Bua.