Es sitzt a' Mauser auf an' Baam,
Der bild't si' wohl 'was ei',
Er steckt si' in sein' Federbalg,
Wie in a' Wildschur 'nei',
Schaugt fürnehm drei'.

Jetz' draaht er seini Augn auf,
Hat 's Lercherl gschwind d'ersegn,
Und daß's so lusti' singt und thuat,
Dees hat er gar nit mögn,
Vo' Bosheit wegn.

Ja Lercherl, 's werd a' schöner Tag,
Wem aber werd er's wohl?
Werd's nit für di' du armer Narr,
Der 's andri singa soll
So hoffnungsvoll.

Der Mauser schwingt si' höcher 'nauf
Als du, so is der Gang,
Und macht an' Fahrer wie a' Pfeil
Und hat di' scho' in Fang,
Aus is der Gsang. –

Und so viel Lercherln geht's a so! –
Mei' Flintn gebt's ma' her!
Der Teufi soll die Mauser holn,
I' leid' meinoad koan' mehr,
Mei' Flint'n her!