Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Feuerreiter

Em Wiesatal brennt's! kotz Heidasalôt!
Wer des doch au schaũn wieder ãnzendet hôt!
Ond au glei drei Häuser! ond d' Spritz ischt beim Flicka!
Dô muaß mer en Reiter ens Obertal schicka!
»Wer hôt denn en Reitgaul?« »I!« sait der Hans! »i!
Meĩn Schemmel stammt jô von der Kavallerie!«
»Wer reit't uf der alta, bocksbeinicha Mähr'?«
»I!« sait der Gotthelf, »wia, füahret a her!
Wia! her a paar Mãn ond lupfet me nuf!
Da Zügel en d' Hand ond nenz weder druf!«
Bock! bock! macht der Schemmel, bock! bock! ond hopp hopp!
Der Gaul macht en Trab ond der Reiter Kalopp!
Mit ma jedwede Schritt schmeißt's da Gotthelf en d' Haih!
Ond plotzt er nô ronter, tuat's allamôl waih!
Ball fangt er vor Angscht ond Waihtäg ãn z'schwitza,
Er kãn nemme rechts ond lenks nemme sitza!
Jetz endlich, wia-n-er schiergar nemme kãn,
Nô hält am seĩn Schemmel en Obertal an.
Dô hebt er seĩn Sitzfleisch mit alle beid' Händ
Ond schreit, was zom Hals raus gôht: »Feurio! 's brennt!«
»So, brennt's?« sait der Jockel, »sell will i net streita,
Wia magscht au uf so ama Beinerg'stell reita!«