Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Starke Leut'

A Herdle Buaba sitzt em Lamm
Am Sonntichôbed, dô gôht's stramm!
Natürlich kommt ufs Starkseĩn d' Red',
Der Fritz haut uf da Tisch: »I wett',
En dritthalbzentnericha Sack
Trag' i grad' wia en Nudlapack!«
»O halt deĩn Maul!« schreit druf der Jerg,
»I trag da-n-allersteilschta Berg
Da Steinschlitt nuf ond seng derzua!«
»Descht ebbes recht's,« sait 's Sägers Bua,
»En Klotz, von dreißich Schuah a Tromm,
Des lupf' i ond guck net z' liab nom.«
Ond jeder haut ond jeder schreit!
So starke Buaba, descht a Freud. –
Net weit aweg em kleina Häusle
Dô wohnt der bucklich Schuaschters-Theisle,
Acht Kender hôt er zom Verhalta,
Derzua da Vater nõ, da-n-alta.
Drom fangt er morga's viare ãn,
Nachts zehne hockt er au nõ drãn,
Ond schuaschtert all'weil druf ond dreĩn,
So macht er fort jôhraus jôhreĩn.
Ond wenn seĩn Lõhnle net recht batt't,
Nô ißt er oft blos halba satt
Ond rackert weiter anstatts gruaba,
Der ischt nõ stärker als dia Buaba. –
Doch ischt der Theis der Stärkscht nõ net,
Des ischt der Hans, der leit em Bett,
Der Ôd gôht schwer, der Kopf ischt heiß,
Ond kalt stôht uf der Stirn der Schweiß.
»Ach Gott!« sait 's Weib, »wia herb hôscht's au!
I nohm der g'wiß gern ab dervaũn!«
»Neĩn!« sait er, »ond wann's möglich wär'
Vom Kreuz gäb' i keĩn Dengle her;
Was Gott schickt, sell ischt keĩn Verderba,
Ond soll's drãn seĩn, i kãn au sterba!«