Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Advent

Am Samschtichôbed vor Advent,
's hent überall schaũn d' Liachter brennt,
Dô sitzt nôch Feierôbedszeit
Der Peter an seim Tisch und schreit,
Er druckt seĩn Ãng'sicht neĩn ens Tüachle,
Ond vor am uf am Tisch leit 's Büachle,
Ufg'schlaga-n-ischt a Sterbgebet,
Er schreit ond schreit ond betat net. –
Em Nôchberhäusle neba drãn,
Dô leit a sterbeskranker Mãn,
Der Hannes, 's Peters ärgschter Feind
Ond lange Jôhr seĩn beschter Freund,
Dem ischt der Taud vor d' Auga g'stellt,
Er will nenz mai von dera Welt,
Seĩn Liacht ischt beinôh ronterbrennt,
Der Taud ond 's G'richt kommt, 's wird Advent!
Der ischt's, om den der Peter schreit,
Für den des Sterbgebet dô leit,
Sooft der Peter beta will,
Sait 's Gwissa zua-n-am: »O, sei still!
Tua 's Büachle weg! Was! dau witt beta
Ond so vor onsern Herrgott treta!
Für'n Hannes beta! Bischt dau's wert,
Daß des Gebet der Herrgott hört?
Weißscht, wia iar zwẽen send ãnsa kleĩn
Da allerbeschte Spezel g'seĩn?
Ond en der Schual en lange Jôhra
Send iar net g'seĩn wia z'semmag'schwora?
Em Lerna-n-ond de Buabastreich
Ãnr wia der ander allweil gleich?
Weißscht, wia mer ich hôt konfermiart
Ond er hôt di en d' Kirch neĩng'füahrt?
Ond en der Kranket, en der Not
Wer hôt di pflegt von früah bis spôt?
Hôt er's net allweil ehrlich g'meint?
Ond den hôscht dau diar g'macht zom Feind!
Dia paar Schuah Feld am Bächle dronta,
Dia hôscht am dau net möga gonnta!
Ond – druck nõ 's Tüachle neĩn ens G'sicht –
Dau hôscht an drom brôcht vor am G'richt.
Ond hôscht deĩn Freundschaft so verrôta,
Was beta! Schäm di en Grondsboda!« –
Des hält der Peter nemme aus,
Er schiaßt en d' Höh' ond naus zom Haus,
En 's Nôchberhaus nom! Neĩn zur Tür!
»Lebt er?« – »Jô!« – »Gott sei Dank derfür!«
Der Hannes guckt grad 's letschtmôl rom
Ond streckt am d' Händ nãn: »Peter, komm!«
Der nemmt's ond fallt uf d' Knia am Bett
Em Elend, – schwätza kãn er net.
Er schreit ond druckt dia kalte Händ',
Dô kommt der Heiland, 's wird Advent!