Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Roßkur

Der Baurahans hôt 's Magawaih,
Keĩn Essa g'schmeckt dem Baura maih.
Ond was er tronka hôt ond g'schluckt,
Des hôt an jomermäßich druckt.
Kaum höra's d' Leut', lauft jedermãn
Ond sait am, was dô helfa kãn.
A Bomöl hôt am d' Hebamm' g'rôta,
Der Tautagräber Hondlesbrôta,
Der Jakob meint: en Bachasteiner,
Wachholderg'sälz verschreibt der Heiner,
Heubloamatee hôt d' Mei hertraga,
Ehn selber g'luscht's nôch Schwartamaga,
Käswasser, sait eĩns, sei für d' Hitz,
»A Schnaps git Wärme«, sait der Schütz.
Der Hans glaubt alles ond schluckt's nā.
Des druckt am schiar da Maga-n-ā.
Jetz, wia 's an beinôh hôt mitg'nomma,
Ischt's seĩnra Lisabeth doch komma,
Mer sott's am End' em Dokter saga,
Was der au meint zom Hans seĩm Maga.
Der Dokter schickt zweẽn Kolba glei
Ond schreibt en Zettel zur Arznei:
»Ein Löffel voll von beiden Mitteln
All' Stund, und vorher tüchtig schütteln!«
»Ha! sell kãn seĩn!« sait d' Lisabeth.
Ond riaft iarn Roßknecht reĩn ans Bett.
»Gang!« sait se, »pack amôl da Baura!
Wia! fescht! er därf de jetz net daura,
Ond schüttl' an amôl g'hörich dur!
Dô stôht's! nô kriagt er seĩn Mixtur!«
Sein Baura schüttla! Ellament!
Dô lacht der Knecht ond spuckt en d' Händ'.
»So!« sait er, »wenn's nô langt, nô schreischt!«
Ond nemmt da Baura zwischa d' Fäuscht
Ond schüttlat an en ãnre Wuat,
Bis d' Lisabeth sait: »Jetz isch guat!«
Nô kriagt der Bauer seĩn Mixtur.
Ond so all Stond, g'nau nôch der Uhr.
Was g'schieht? Meĩn Hans wird besser ond
Nôch etlich Tägla ischt er g'sond!
Des git em Flecka rom a G'schrei,
Wia des beim Hans au möglich sei.
»Er hôt halt«, sait nô d' Lisabeth,
»Seĩn g'höriche Behandleng g'het.«