Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

(94) Wie der hochberûmbt Held Teurdank an einem
Schanzen erworfen sein sollt.

Neidelhart gieng zum Helden dar,
Sprach: »Mein Herr, ich sag Euch fürwar,
Daß hie aus diser nechsten Stadt
Mein Frau, die edel Künigin, hat
Großen Gedrang und Überlast.
Ich gelaub, daß man sich nit fast
Dorft bemüen, man gewunn si wol.
Gůts Geschütz ich Euch geben soll
Darzů, wo es wird sein Eur Rat.«
Teurdank der Held sprach: »Wer hat
Dir ein Kundschaft geben darvon?«
Neidelhart antwort im: »Ich han
Des gewisse und gůte Kundschaft.«
Der Held sprach: »Gee hin und verschafft verschafft: sorg dafür.,
Daß sich das Volk leger darfür
Und mit inen das Geschütz für,
So will ich kummen bald hinnach.«
Neidelhart sprach: »Herr, ist es Sach,
Daß Ir nit sein werdet darbei,
So werden si han ein Geschrei
Und gmeinklich kein Ordnung halten.
Ir müeßt alle Ding verwalten,
Sunst ist es je vergebens gar.«
Teurdank sprach: »So nimm morgen war,
Daß verhanden sein Bauren gnůg,
So die Schanz mir nach meinem Fůg
Künnen ordenlichen machen.«
Neidelhart sprach: »Herr, die Sachen
Will ich bestellen nach Notdurft wol;
Ich weiß, was man darzu han soll.«
Als nun die Sach beschlossen was,
Neidelhart der Dieb was nit laß laß: faul.,
Sonder schickt hinein in die Stadt
Zů etlichen aus dem Rat,
Ließ in eigentlichen sagen:
Ee es morgen wurde tagen,

So wollt der Held Teurdank ir Stadt
Blegern Blegern: belagern.. Wiewols wider sein Rat
Wer, so mocht er nit darwider sein,
Und wurd der Held kommen hinein,
So hett er geschworen ein Eid,
Zů ertöten Frau, Mann und Maid.
Darumb sollten si haben acht:
Welcher heint in der finstern Nacht
Am nechsten zů der Maurn wurd gan,
Daß si dann auf denselben Mann
Wurfen mit Steinen groß und schwer.
Wann dann der Held erworfen wer,
So wollt er on allen Verzug
Alles Volk mit gar gůtem Fug
Bringen wider von irer Stadt.
Den Burgern gefiel des Böswichts Rat.
Als nu kam daher die Mittnacht,
Und Teurdank hett ein Teils gemacht
An der Schanz, nam er ein Bauren
Mit im und gieng zu der Mauren,
Zů besehen, ob die wer fest.
Kein Wort er umb die Burger weßt,
Die oben warteten auf in.
Da er an die Mauren kam hin
Und si meinten, der Held wer gewiß,
Ein Burger ein Stein fallen ließ,
Traf den Baurn, der ob dem Held stund,
An sein Kopf, daß er fallen gund gund: begann.,
Und am Fall schlůg er den werden
Held auch nider zů der Erden.
Teurdank sich bald wider weg macht;
Si schussen und warfen; das kracht
Dem Helden grausam hinden nach.
Der Baur auf allen viern dann krach
Und wollt zů der Mauer nit mer.
Teurdank der schlůg das Leger
Für die Stadt nach dem Willen sein.
Als nun das Geschrei kam hinein
Zum Neidelhart, dem bösen Mann,
Daß Teurdank wer kommen darvon,
Und doch der Wurf im so nahend
Wer gangen, do lief er behend
Zů dem teuren Helden hinaus,
Sprach: »Herr, was macht Ir doch daraus,
Daß Ir so gering wagen tůt
Und Eur Sach nit baß halt in Hůt?
Wann Euch jetz etwas beschehen wer,
Keiner wer im Feld bliben mer.«
Teurdank sprach: »Es ist geraten wol,
Ich hoff, der Wurf inen noch soll
Wol werden mit der Zeit vergoltn.«
Neidelhart hett die Burger gescholten
In seim Sinn, daß si hetten gefelt.
Er dacht im: All mein Gůt und Geld
Wollt ich warlich darumb geben,
Daß er hett verlorn sein Leben;
Doch hoff ich, er můß noch Har lan,
Wiewol er jetz ist kommen darvon.