Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

(63) Der edel Teurdank sollt aus Anweisung Unfallo in
einen Brunnen gefallen sein, das doch Gott verhût.

Unfallo fiel ein anders zů,
Dann er hett weder Rast noch Rů,
Wie er mocht den Held betriegen,
Er schambt sich ganz keines Liegen Liegen: Lügen..
Eins Mals er zů dem Helden sprach:
»Herr, all mein Tag ich nie gesach
Ein fester oder sterker Schloß
An Maurn dick und darzů groß
Dann das, so neulich gwunnen ist
Mit Gwalt on Verreters List.
Darumb rat ich, Ir laßt mit nichten,
Sonder tüet dasselb besichten.«
Der Held sprach zů Unfallo: »Ja,
Ist das anderst in der Nehent da.«
Nun hett Unfallo darumb das
Angfangen, dann an dem Weg was
Vor Zeiten ein Brunn gestanden;
Dasselb Loch stund noch verhanden,
Was verwachsen mit langem Gras;
Wer für ritt, möcht nit sehen das.
Nun was Unfallo Anschlag:
Ich will vor reiten, was ich mag,
So wird der Held nacher rennen,
In der Eil das Loch nit kennen
Und villeicht treffen den Brunnen.
Als auf gangen was die Sunnen,
Unfallo hett zů reiten Gir;
Als si kamen zů dem Brunn schir,
Dann er lage nahend an der Straß,
Darumb vor Zeit ein Maur gwesen was;
Die war aber zerrissen gar.
Da si zů dem Haus kamen dar,
Unfallo dem Held sagt vom Schloß,
Wie es gwunnen wer mit dem Geschoß,
Zeigt im die Löcher hin und her,
Wie es mit Morsern geworfen wer.
In der Red ritten si fürbaß
Gar nahend, da der Brunnen was.
Dieweil der Held das Schloß sah an,
Ließ er sein Pferd on Acht fürgan.
Dasselbig on alles Gefer
Traf den Brunnen nach dem Beger
Unfallo und trat gleich darein
Mit dem gerechten Füeßlein sein,
Darab der Held erschrak gar ser.
In solchem warde im nit mer,
Dann daß er den Zaum an sich zuckt
Und das Pferd mit Gwalt heraus ruckt,
Sach damit den tiefen Brunnen,
Sprach: »Ich reit fast unbesunnen;
Wie, wann ich darein gefallen wer?«
Unfallo sprach: »Herr, Ir seid zů ser
Geritten auf die recht Seiten,
Hinfür will ich Euch vor reiten.«
Teurdank der ließ die Sach gůt sein,
Beschauet, wie man hett hinein
In das Schloß geschossen so seer.
Darnach wollt er nit bleiben mer,
Sonder anheim reiten zůhaus.
Unfallo dem wollts werden aus
Dem Scherz, daß im all sein Anschleg
Wollten felen in alle Weg.
Noch ließ er mit nichte darvan,
Sonder fieng weiter ein anders an.