Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

De Wegwiser

En guden Rat to guterletz

Weest, wo de Weg na't Mehlfatt is?
In't Morgenrot herut to Strat,
Mit Plog un Hack dör't Weetenfeld.
Bit abnds de Steerns an'n Heben staht,

Du hackst, so lang de Dag di hölpt,
Un kikst nich um, – de Tid is rar!
Nöst geiht't de grote Lohdehl dör
Un na de Kök, – so büst all dar.

Weest, wo de Weg to'n Daler is?
Bi'n roden Penning neeg hinlank;
Un de nich op'n Penning paßt,
Kummt nümmermehr to'n Daler blank.

Wo is de Weg na d' Sünndagsfreud?
Gah Warkeldags smuck flidig man
De Warkste' dör un't Ackerfeld.
De Sünndag kummt vun sülbn all an:

Des Sünnabnds is he nümmer wit,
He driggt en Korf, – wat drin, is din,
En frische Supp, – en gut Stück Fleesch
Un füh! wul gar en lüttj' Glas Win.

Weest, wo de Weg in d' Armot geiht?
Na't Weertshus 'rin, man jümmers frisch!
En lüttjen Snapps. – en lüttj' Glas Beer,
Un Karten li't dar op'n Tisch.

In't letzte Weertshus liggt en Sack,
Hang'n um! de is för di alleen!
Du ole Lump! wa lett di doch
De Bettelsack so wunnerschön!

En hölten Kumm kriggst noch op to;
Verleer ehr ni! – Un wenn du mal
Bi'n Water kummst un döstig büst,
Un drinken magst, so düpp man dal!

Wo is de Weg na Fred un Ehr
Un na en gudes Öller hin?
Lik vör di ut, in Mäßigkeit
Un Recht, – un mit en braven Sinn!

Un wenn du mal an'n Krüzweg steihst
Un ni mehr weest de rechte Strat,
Stah still und frag't Geweten eerst,
Kann dütsch. Gott Lof, un folg sin Rat.

Wo mag de Weg na'n Karkhoff gahn?
Wat fragst noch lang?! – de's licht to finn!
Na't stille Graff in'n kolen Grund
Bringt alle Weg toletz di hin.

Doch gah mi smuck in Gottesfurcht
Bit ganz to Enn, – dat ra' ick di!
In't Graff is noch en heemlich Döhr,
Un wat darachter, – weest du ni!