Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Agathe.

An de Bahr vun ehrn Vader.
Agathe, kumm un wes' ni bang!
Wat wullt du seggn? ick mark't all lang;
Kumm her, un ween mi ni so dull!
He hett't ja gut, em is ja wol!

He liggt dar rein so fründlich doch,
Als seeg he uns un hör uns noch;
He lacht sogar, Herr Jesus, süh!
Als snack he noch mit di un mi.

He heel en sware Krankheit ut,
He seggt: »Nu is dar allens gut,
De Dod, de hett min Wunsch erfüllt
Un hett min hitzig Fewer stillt.«

Un mennig Kummer harr de Mann,
He seggt: »Nu kummt mi nix mehr an,
Un wat ock kummt, mi geiht't verbi,
In'n Karkhoff nerrn, dar hör ick't ni.«

He hett en bösen Nawer hatt,
He seggt: »Uns' Herr vergev em dat;
Un wo em't feilt, dar tröst em Gott
Un gev em ock en sanften Dod.«

He sülbn harr ock sin Fehlers, ja!
Wat mak't? – wi dregt em't ni mehr na;
He seggt: »Nu bün'ck darvun erlöst,
Min Hart, dat weer doch nümmer bös'.«

He slöppt un kikt di ni mehr an,
Un harr doch sunst sin Freud daran,
He seggt: »Will's Gott, min gudes Kind,
Dat wi uns baben wedderfinnt.«

Nu gah, Agathe, denk daran,
Din Vader weer en braven Mann;
Nu gah, un hol di gut un fram,
Din Stunn, de ward dar ock mal kamn.