|
||||||||||||||
| Autoren | ∞ | Werke | ∞ | Neu | ∞ | Information | ∞ | Shop | ∞ | Lesetips | ∞ | Textquelle | ∞ | |
|
|
||||||||||||||
| Autoren | ∞ | Werke | ∞ | Neu | ∞ | Information | ∞ | Shop | ∞ | Lesetips | ∞ | Textquelle | ∞ | |
Anzeige. Gutenberg Edition 16. 2. vermehrte und verbesserte Auflage. Alle Werke aus dem Projekt Gutenberg-DE. Mit zusätzlichen E-Books. Eine einmalige Bibliothek. +++ Information und Bestellung in unserem Shop +++
De Klock hett tein sla'n,
Tein is de Klock!
Nu bedt un gaht mi smuck to Bett,
Un wer en gut Geweten hett,
De slap man to, – dar baben sacht
Wakt Gottes Og de ganze Nacht.
De Klock hett ölm sla'n.
Ölm is de Klock!
Un wer sick noch mit Arbeid quält,
Un wer noch sitt un Karten spelt,
Den wull ick't seggn un wull em radn,
Dat's hoge Tid, to Bett to gahn!
De Klock hett twölf sla'n,
Twölf is de Klock!
Un wakt dar noch en Hart in Leid
Vull Kummer un vull Trurigkeit,
So gev em Gott en ruhig Stund,
Un mak't vergnögt un wedder sund!
De Klock hett een sla'n,
Een is de Klock!
Un wo mit Satans List un Rat
En Spitzbov sliekt op böse Dat, –
Ick höp datt ni! – – doch weer dar een, –
Lat't na! uns' Herrgott kann't ja sehn!
De Klock hett twee sla'n,
Twee is de Klock!
Un wo all wedder, ehr't noch dagt,
De Sorgen een an'n Harten nagt,
Du arme Schelm! – din Slap is hin –
Gott sorgt, – he ward di ock wul sinn!
De Klock hett dree sla'n,
Dree is de Klock!
De Morgenstunn an'n Heben swevt,
Un wer in Fred den Dag belevt,
Dank Gott – un fat mit frischen Mot
Sin Dagwerk an un hol sick got!