Plattdeutscher Hebel

Anzeige. Gutenberg Edition 16. 2. vermehrte und verbesserte Auflage. Alle Werke aus dem Projekt Gutenberg-DE. Mit zusätzlichen E-Books. Eine einmalige Bibliothek. +++ Information und Bestellung in unserem Shop +++

De Moder op'n Wihnachenabnd.

He slöppt, he slöppt! dar liggt he als en Graf!
Du lüttje, söte Engel, du,
Ligg du man still un slap in Ruh,
Gott günnt di't uck in'n Slap, wat ick di lav!

Warr jo ni wak, warr jo ni wak!
Un seh' ni, wat din Moder mak!
Se geiht mit weeken Modersinn
Un halt di lis' den Dannbom 'rin.

Wat hang ick denn daran?
En Honnigkokenmann,
En lüttje Popp, en Muschekatt,
En Hütjeperd, un sunst noch wat,
En smucke Blom, witt, rot un gehl
Vun't allerfinste Suckermehl.

Is nog, du Moderhart!
Veel söten Kram, dat smarrt.
Gev sparsam als de leewe Gott,
Nich alle Dag nütz't Suckerbrod.

Nu rode Appeln her,
De schönsten, de man wünschen kann,
Dar is ock nich en Placken an.
Wer hett se schöner, wer?

Dat's wahr, dat is en Pracht,
Wa so en Appel lacht!
De Suckerbäcker kam mal an,
De so en Appel maken kann!
Dat kann uns leewe Herrgott man.

Wat heff ick denn noch mehr?
En Taschendok so witt und rot
Un smucke Blum daröwer sei't;
O Kind, vör bittre Tran und Leid
Bewahr di Gott, bewahr di Gott!

Wat hang ick mehr noch 'rin?
Dat Bok, min Kind, hört ock noch di.
Ick legg dar smucke Biller bi;
Gebet' sünd all vunsülbn darin.

Nu weer ick denn wul klar?
Putz dusend ne! dar fallt mi in.
En lüttje Rod' mutt ock noch rin,
Dar is se all, süh dar!

Kann we'n, dat freut di ni,
Kann we'n, se sleit di noch mal wund;
Doch wullt du ni, so is di't 'sund,
So is't ja gut för di.

In Gottes Namen man;
Doch Moderleev hett deepen Sinn,
Se makt dar rode Bänner in
Un smucke Sleufen an.

Nu weer he denn torecht,
Un wenn eerst morrn de Dag verstummt,
Un lis' de stille Abend kummt,
Hett Kikengeest em bröcht.

Du dankst mi ni darum,
Un weest dat ni, min Plumm,
Doch makt dat man en Freud för di,
So is't all dusend nog för mi!

Herrje! de Wächter röppt,
Wa doch de Tid een löppt!
Man markt dat garni, wa se swinnt,
Wenn't Hart mal so en Nahren finnt!

Nu slap, min lüttje Graf!
Vunnacht weer't, wo de hillig Christ
En Kind wurr, ebn als du dat büst,
Warr ock so gut un brav!

Inhalt

De Moder op'n Wihnachenabnd.