Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Auswahl Deutscher Gedichte für höhere Schulen

De Koppweihdag'

»Gun Morgen, Herr Apteiker! Seggen S' mal
Wat is woll gaud för Koppweihdag'?«
»Min Sähn, dat is de düllste Qual,
Dat is 'ne niderträcht'ge Plag.
Na, sett di man en beten dal.
Du büst woll her ut Frugenmark?« –
»Ja, Herr! Ick dein dor up den Hoff.« –
»Na, sünd de Koppweihdag' denn stark?« –
»Ja, Herr! Sei maken't gor tau groww.« –
»Na, denn kumm her un dauh
Mal irst din beiden Ogen tau. –
Süh! so is't recht! Nu rük mal swinn
All, wat du kannst, in best Buddel 'rin.« –
De Bengel deiht ok ganz genau,
Wat hei em heit: makt irst de Ogen tau
Un rükt recht düchtig 'rinner dunn.
Bautz! föll hei rügglings von den Staul herun.
Als hei nu wedder sick besunn,
Seggt de Apteiker: »Sähn, nu segg:
Sünd dine Koppweihdag' nu weg?« –
»Ih, Herr, von mi is nich de Frag',
Uns' Frölen hett de Koppweihdag!«

Fritz Reuter