Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Auswahl Deutscher Gedichte für höhere Schulen

Großmutting, hei is dod!

Twei Fruen sitten an'n Füerhird,
De Ollsch is still und gemaud.
Dat Mäten äwerst vör Bangen frirt;
Wo bewert dat junge Blaud!

»Großmutting, hork! – Hest hürt, hest hürt? –
Dor kloppt wat an de Dör.
Großmutting, ach, mi frirt, mi frirt.
Min Hart is gor tau swer." –

»Wees ruhig still; dat is de Wind,
De schüddelt den Appelbom;
Giww di gefangen, leiwes Kind,
Denk, 't is en sweren Droom!" –

»Ne, ne! Dat kloppt, dat kloppt hir an!" –
Dat Mäten springt in En'n,
Rut ut de Dör, dor steiht en Mann,
Den Mann, den süll sei ken'n. –

»Ja, ja! – En Breiw? en Breiw för mi?
Giww her! giww her, giww rasch!«
Hei halt em rut. »Hei is an di,«
Rut ut sin Schicksalstasch.

Un as hei nu den Breiw ehr giwwt,
Dunn wenn't s'em üm un üm:
»Großmutting, dat 's nich sine Schrift,
Un ik weit woll worum.«

Sei breckt den Breiw: ob hei lewt, oder ob –?
De Breiw föllt in ehren Schoot;
Sei smitt de Schört sik äwer den Kopp:
»Großmutting, hei is dod!«

Fritz Reuter