| |
Lieber Freund, jetz' hör emol,
Was sächt mer vun meine Gedicht'?
»Ja, weescht de, es dreht sich deß Dichte' do
»Alls um die nämlich G'schicht',
»Mer find't se recht hübsch un' 's fehlt nor dra,
»Was schier de' mehrschte fehlt,
»Mer meent, mer hätt' se gelese' schun
»Oder 's hätt's emm schun eener verzählt,
»Du muscht's nit übl nemme, verstehscht,
»Sie sage', 's is halt nix Neus,
»Mer kennt die Bilder un' Alles deß,
»Mit all' dein'm Gschick un' Fleiß.«
Ja Bilder! Mit de' Bilder geht's
Wie mit de' Blume', sich!
Was for die Ann're wachst un' blüht,
Deß blüht halt aach for mich,
Was aber kann dann ich drfor,
Wann der un' der sich bückt,
Un' eh' ich nor gebore' bin,
Schun Alles roppt un' plückt!
Was die Hauptstück', die prächtiche Rose sin,
Die hot schun der Schiller g'holt
Un' der Goethe, der Rückert, der Lenau aach,
Die habe' viel 'mit gemolt,
Die Veil'cher hot sich der Uhland gewählt,
Der Geibel die Sunneblum,
Der Platen die Tulpe', un' gar überall
Hot der Heine gekrabblt 'erum.
Vergißmeinnicht?! Du lieber Gott!
Jeder Schneider hot voll die Händ',
Do müßt schun eener der Adam sey',
Daß er die als neu bringe' könnt'.
For Lilie un' Epheu un' Rebe'laab
Geb' ich aach ke' rothi Bohn,
Denk an de' Juschtinus Kerner nor
Un' de' alte Mathisson.
Un' mit Myrthe' un' Lorbeer un' Palme' gar,
Do is es grad' e' so,
Die gits jo wäge'voll uff der Welt,
Es is halt Alles schun do!
Jetz' such' d'r 'was Neu's! un' muß dann deß sey'?
Geht e' Stern nit for ewig im Kreis
Un' is dann der Mond, for den mer so schwärmt,
Un' die Sunn'? is dann deß was Neu's?
Ne, ne, 's is was anners, vun Obe' fehlt's,
Es is halt die Bureaukratie,
Un' ihr' ewigi Vormundschaft übers Volk,
Daß ke' Mensch nix mehr wees' vun Genie!
Drum laafe' se All' als wie die Schoof
'M Autoritäts-Hamml nōch,
Un' wär' aach der Schiller nix gege' mich,
Sie schreie' doch: Schiller hoch! – |
