Ich weß nit wo ich deß so lern',
Denk ich an's Liebche' fei',
Im Frühjohr hab' ich's doppelt gern,
Als wie im Herbscht de' Wei',
Un' denk ich an die Hochzeit ach,
So bild' ich mer's halt ei'
Un' traam's im Schlof un' wann ich wach',
Im Frühjohr muß se sey.

Nor eens is schad', un' 's gschicht halt nit,
Ich wollt' wann 's Frühjohr käm'
Brächt's aach e' Stückche Jugend mit
De' Mensche' wie de' Beem,
Uns aber wehrt's gar knickerich,
Was jedi Planz genießt,
Deß is des eenziche, was mich
Im Frühjohr als verdrießt.