Die Diener heese' die Gedanke'
Un' wer's betracht't, der weeß gewiß,
Daß so e' Diener viel zu thu' hot
Un' oft nit zum Beneide' is.

Do hockt der Herr bequem im Garte'
Un' raucht sei' Peifche' zum Kaffee,
Jetz' fallt 'm ei', er möcht wohl wisse',
Wie 's juscht mit de' Chineser steh'.

Do schickt er so 'n arme Deubl
Noch China, ei der sächt ke' Wort
Un' tummlt sich un' laaft wie bsesse'
Un' eh' dich umguckscht, is er dort.

Glei' druf, do muß e' annrer laafe'
Un' in die Schweitz noch sein'm Begehr,
Der Herr will wisse', wie die Jungfrau,
Der Berg dort, zum besteige' wär.

Jetz' denkt euch, deß hot halt sei' Naupe',
Herunne' geht's noch allnfalls,
Doch bei dem ferchterliche Grable',
Do brecht jo eener leicht de' Hals!

Un' oft beim allerschlechtschte Wetter,
Do summst er eem 'n Vers in's Ohr
Un schickt 'n fort d'rmit zum Schätzche'
Un sächt' 'm, sag's ihr wiedder vor.

Bal' zum e' Bauer, bal' zum König,
Wie's halt grad is, muß eener geh',
Un' sich! wann Staatsvisite' kumme',
Muß Alles in Parade steh'.

Deß geht de' ganze Tag nit anners,
Doch anners gehts halt bei der Nacht,
Deß heest, wann juscht der Herr will schlofe',
Dann 's is der Dienscht, so lang' er wacht.

Doch wann er schloft, so thun die Diener,
Was ihne' gfallt, gar ungenirt,
Do werd geschwätzt un' werd gebablt
Un' über Alles räsonnirt:

Do spotte' s' n' un' lache' über 'n,
Der ee' macht' 'm e' langi Nas',
Der anner bringt 'm in sei' Zimmer
Weeß Gott was for e' Stadtfraabas'.

Un' manchmal is sogar schun gschehe',
Daß wann der Herr is uffgewacht,
Daß gar ke' Diener war zu sehe'
Un' Alles sich drvu' gemacht.

Natürlich is deß zum Verzweifle
Un' die Verlege'heit gar groß,
Dann so e' Herr der is verlosse'
Un' was mer sächt', gedankelos.

Jetz' deß is richtich, selber schuldig
Is oft der Herr in so 'me Fall,
Dann mancher gebt 'n kaam zu fresse'
Un' ploocht un' quält se' überall.

Ich hab' een g'frocht, 'n alte Kerl,
Der viel gedient verschiedne Herrn,
Diewelle dann die gröschte Narre'
Un' bsunners wiedderwärtig wär'n.

Do sächt er, mei' Gott, unser eener,
Der richt't sich halt, wie's is im Haus,
Nor eens nit, beim e' schlechte' Dichter,
Die Gränk, do halt's der Deubl aus!