Deß Erschte is der Spiritus,
Doch geht's mit kemm' gemeene',
Sunscht merkt mer glei' de' Fusl drinn,
Der loßt sich nit gewöhne'.

For's zweete brauchscht de allerhand
Von Früchte' un' vun Blume'
Un' manches Kräutche jung und frisch
Werd aach drzu genumme.

Deß muscht de im e' gute Glas'
Mi'nanner deschtillire'
Un' nocher, wie's d'r grad beliebt,
Noch Zucker drunner rühre'.

Die Früchte, Zucker, Kraut un Blum
Die losse' sich schun finne'
Un' brauchscht dich, host de Geld genuch,
Nit viel do d'rüber bsinne'.

Doch for Retort un' Spiritus
Do muscht de selber sorche',
Die kaaft mer nit um alles Geld
Un' kannscht se aach nit borche'.