Sei' Spruch vun Wein, Weib un' Gesang,
Den stoßt 'm kenner um
Un' wär' die Welt aach überg'scheit
Un' wär' se noch so dumm.

Dann deß is e' Trifolium,
Wo gar nix drüber geht,
Natürlich, wann se gut un' fei',
Wie er's halt aach versteht.

Un' denkt mer nor e' bische' noch,
So fallt's emm selber ei,
Wie lumpich ohne die die Welt
Un' lendelahm müßt' sey'.

Do gäb's ke' Lieb', ke' Poesie
Un' was schier ärger wär',
Kenn' Markebrunner, kenn' Bordeaux
Un' kenn' Champagner mehr.

Do wär' e' wahri Wassernoth
Weeß Gott, for Leib un' Seel,
Un' thät ke' Mensch mehr luschtich sey',
Wär' Alles schepp un' scheel.

D'rum hot der alte Martin recht,
Sei Spruch is schö' un' klar,
Un' 's is nor schad', daß halt der Mann
Erschrecklich luthrisch war.