»Herr Belzebu, ich bitt' um Audienz,
Ich kann nit länger mehr Direktor sei',
Denn die Genie's, die bringe mich noch um,
Do schlagt nix a', un' fahr' ich noch so drei'.

»Ihr Stolz is unbeugsam, g'rad wie Granit,
Do nutzt ke' Siede' un' ke' Brate' nix,
Ich hab' mit ihne' Alles schun probirt
Un' hab' erschöpft mei' ganzi Quaale'bix.«

»»Die Gränk!«« fahrt zornig uff Herr Belzebu,
»»Was muß ich höre'? und' wer sin dann die?«
»Wer sin se? no'! so Philosophe' halt,
»Der Voltaire, Hegl un' die Cumpanie.

»Es macht se gar nix merb, deß heillos Volk,
»'S is g'rad, als wär's nix um e' Hölle'strof,
»Der alte Nero un so Exemplar
»Sin Schoof dagege', zahme gute Schoof'.

»Wann deß so fortgeht, mache' mer bankrott,
»Die Höll' verliert noch all' ihr Renommee,
»D'rum soll e' Annrer thu', was ich nit kann,
»Herr Belzebu, 's is besser, daß ich geh'.«

»»Nor nit verdroße'!«« sächt der alte Fuchs,
»»Ich mach' jetz' noch Amerika e' Rees',
»»Do find' ich schun 'was, daß ich ihne kumm,
»»Deß wär' der Deubl, wann die Höll' nit hees'!««

Als Gentlemen reest druff der Potentat
Hi' nach Neu-York un' guckt sich halt do um,
Was 's Neu's git, dann do kann er lerne' viel,
Deß wees' er, war sei' Lebelang nit dumm.

Un' richtich! glei' im erschte Kaffeehaus
Do mache' se e' Tischexperiment,
Der Disch, der dreht sich um e' Fingerspitz'
Un' Alles is verwunnert hi'gerennt.

»Den Tisch bewegt e' Geischt!« hot eener g'sacht,
»E' Geischt! e' Geischt!« gehts jetz' im G'ringl 'rum,
»Horch! habt Ihr's g'hört, er kloppt, er hot gekloppt,
»Vielleicht verkünd't er e' Mischterium!«

Un' Jeder horcht, jetz' fangt e' Dandy a':
»Du Geischt do drinn, geb' Antwort, 's macht ke' Müh',
»Ich will nor, daß de mer mit Kloppe' sächscht,
»Wie viel Cigarre' sin in mein'm Etui?«

Der Tisch is 'rumgetorchlt wie zuvor
Un mit Gequix halt hi' un' her geruckt,
Doch habe' ee' gekriesche': »Er hot's gsacht,
Der Geischt hots gsacht« un' Alles war verzückt.

Herr Belzebu hot aber sich gedenkt:
O Narre'-Welt! do sicht mer recht, wie's geht,
Deß müßt doch sei' e' Bettlbube-Geischt,
Der sich um so 'n Dienscht nit schäme' thät'.

Un' wie er's denkt, so kummts 'm wie e' Blitz,
»Jetz' hab' ich's, wart du Voltaire-Cumpanie,
»Mit dem will ich euch zwible', gilt's e' Wett',
»Ihr bitt' um Gnad' trotz der Philosophie.«

Un' dictum factum! packt er die Genie's
Un hot se in die Tisch' eneigestoppt
Un' cummandirt se zu dem Klopperdienscht
Un' voller Aerger habe' se gekloppt:

Wie alt die Jenny un' die Elln is,
Wie lang der Kaschtor noch, der Renner, laaft,
Wie viel Pfund Sterling der un' jener hot,
Wie theuer mer 's Guano noch verkaaft,

Um all' so Zeuch un' was halt eener gfrocht,
Sie habe kloppe' müsse Tag un' Nacht,
Un' 's ware' nit emol zwee' Woche' 'rum,
So hot se's zur Verzweiflung All' gebracht.

Dann jed'm Laff' zu buchstabire' 'was,
Deß war zu arg, un' die sunscht so getobt,
Sie habe' gern jetzt um Pardon gebitt'
Un habe' guti Aufführung gelobt.

»Aha! Ihr Junge', seid Ihr endlich brav,«
Hot doch Herr Belzebu getriumphirt,
»Gel' mei' Direkterche', ich habs gewißt,
»Ich find' noch, was sei' Rapplköpp' korirt.«

»»O großer Flamme'-Sultan,«« hot der g'sacht,
»»Jetz' is mei' Stellung widder e Plaisir,
»»Un voll Respekt und voll Bewunnerung
»»Mach' ich mei' Compliment un' gratulir'.««

Des is die G'schicht' un' weil mer halt jetz' wees',
Wer deß Geklopp hot uff die Welt gebracht,
So is ke' Wunner, wann's oft een' verschreckt
Un selber kecke Leut' e' Grußle' macht.