'S war e' Prälat, e' Held, e' Kaufmann
Natürlich Männer vun Verstand,
Die sin' dann pünktlich zammekumme,
Die Zeit war artig un' scharmant,

Un' hot d' ererscht 'n Vortrag g'halte',
Mei' Meenung sächt se, deß wär' die,
Die Menschheit muß Moral studire',
Dann wachst se wild, geroth't se nie.

Drum soll, was geischtlich is, regire'
Die erschte nächschte hunnert Johr,
So kann se sich e' bische bilde',
Der Herr Prälat steht gut drfor.

Doch daß se nit die Derke (Türken) fresse',
Dann do helft doch ke' Lehr un' Roth,
So muß se sich aach wehre' könne',
Wann's juscht gebiete' thät die Noth.

Drum meen' ich, daß im zweete Hunnert
E' tüchtiger Soldat regiert,
Do kann se manövrire lerne'
Un' wie mer schießt un' exercirt.

Im dritte Hunnert soll se treibe',
Verkehr un' Hand'l brüderlich
Un' soll 'n Zollverein errichte',
So denk' ich mer so macht se sich.

Deß war der Vorschlag, no' natürlich
Hot mer gebablt hi' un' her,
Doch sin' se endlich eenig worre',
Daß so e' Gang passabl wär'.

Jetz' aber mußt mer noch berichte'
'M Schicksal vun der ganze Gschicht.
Dann deß war for die Zeit un' Alles
Vun je deß öberschte Gericht.

Un' 's Schicksal sächt: Ihr macht Planete',
Do werd emm übl schier drbei,
Was wär' dann ohne hübsche Weiber
Die ganz' studirt Regiererei.

Do möcht' ich den Spetakl sehe',
Do ging jo Alles überzwerch
Un' gäb' Revolte' un' Cravalle',
Es stünde emm die Hoor zu Berg.

Die Weiber müße mitregiere',
Sunscht is die Politik verletzt,
Un' will die Zeit sich opponire',
So sag' ich, werd se abgesetzt.

Jetz' Punktum. Deß war 's Ultimatum
Un' folge müsse' hot die Zeit,
Un' so regiern balt mit die Weiber
Un' wern 's aach thu' in Ewigkeit.