Wann ich dir's sag', die junge' Leut
Sin nimmer so, wie zu meiner Zeit,
Wann se genung ihr Couranze' gemacht,
Werd hinne' nōch nor d'rüber gelacht.
    »»'S git doch noch annere aach.««

Sich! so e' Mann, der was kann und was is,
Deß is e' Mann, do wescht doch gewiß,
Daß er 'n Ernscht hot, un' sorgt for dich,
Mädele, sich! so e' Mann wär' ich!
    »»Ei ja gewiß, Sie sin' brav.««

No', un was is dann nocher nit recht,
Weescht lang, daß ich dich heurate' möcht',
Geb' mer dei' Händche', sey gut mei' Kind,
Nor nit so bsinne', als luschtich, gschwind!
    »»Muß d'rüber schlofe' zuvor.««

Ich hab' e' Haus, 'n Gaarte' drbei,
Is schö' gelege', un' hübsch un' neu,
Hab' e' Vermöge', deß manchi möcht',
Aber juscht du, du wärscht mer recht.
    »»Wisse' Se, wiviel Uhr 's is?««

Mädl?! du bischt e' verzogeni Popp,
Hoscht 'n eige'sinnige' Kopp,
Wärscht mer wohl anners bei meiner Ehr',
Dunner, wann ich dei' Vater wär'!
    »»Do hätt' ich Ihne' recht lieb!««