Als Freund vun gute' Christe'
Hot er bei Meenz sei' Haus,
Guckt in de' Main un' in de' Rhein
Fideel zum Fenschter 'naus.

Er is e' golde' Männche',
Spetaklt juscht nit viel,
Hot aber Geischt und Spiritus,
Wie mer's nor habe' will.

Un' wie er ach so gütig
Un' so voll Gnade' is,
Wann eener böse Skrupl hot,
Er helft 'm ganz gewiß.

Er kann so freundlich sage'
E' tröschtlich mildes Wort
Un' quält emm Sorg' un' Kummer aach,
Er bringt se sicher fort.

Froocht 'rum in deutsche Länder,
Wo mer sein' Name' kennt,
Ob jeder nit verehrungsvoll
Den brave' Dechant nennt.

Er macht aach große Reese',
B'sucht alle große Herrn
Un' überall, ich weeß's gewiß,
Ja überall hot mer'n gern.

Ei lieber Herr vun Hochheim,
Kummt aach emol zu mir,
Un' bleibt e' Weil', ich geb Euch gern
Mei' allerbescht' Quartier.