Do frocht se de' Necker, o sag' mer doch,
Kummt heut' des Schiff vun Gundlheim noch,
O sag', du hoscht 'm doch nix getha',
Du hoscht doch wohl kenn' Aerger dra'.

O lieber Necker, ich bitt' dich schö',
Deß Schiff nor loß mer glücklich geh',
Do is mei' Lieb', mei' Alles drinn,
Du sichscht jo, wie ich in Aengschte bin.

Der Necker, der brummlt, ke' Mensch weeß was,
Un' macht e' Gsicht gar trüb un' naß,
Un' 's Mädche' als guckt, un' ringt die Händ',
»Mei' Gott wann der Necker nor rede' könnt'.«

Un' wie se deß seufzt in ihr'm Weh,
Do taucht aus 'm Necker 'was in die Höh',
E' großer Stee' un' druf e' Schrift,
Do war deß Mädche' ganz verblüfft,

Un' kummt in 'n Schrecke', du lieber Gott,
Daß se an alle' Gliedder gezittert hot,
Un' hot sich nit zu lese' getraut,
Un' hot mit Thräne' zum Himml g'schaut.

»Was is dann dem Kind,« hot e' Schiffer g'sacht,
Der zufällig aach de' Necker betracht't,
»Was hot se dann, sächt er, was flennt se dann so?«
Un' sie jammert: ach les' Er die Buchstabe' do.

»Was is do zu lese', deß is bekannt,
»Es heest:
                  Wann ich seh' Himml un' Land,
                  So is der gute Necker so klee',
                  Daß d'ruf gewiß ke' Schiff kann geh'.

Un' wie se deß hört, springts flink un' fluggs
Un' gebt ihr e' Küßche' hinnerrucks,
Der Schatz war kumme' mit Extraposcht,
Do hot's ke' Thräne' mehr gekoscht.