Sich! wann ich a'fang', spinnt sich glei'
Die Lieb' natürlich 'nei',
Do dicht' ich mer e' Mädche' halt,
Die muß gar goldich sey',

Muß schö' sey', gut un' gscheit un' lieb',
Ich loß nix fehle' dra'
Un' guck' se wann se fertig is
Recht mit Vergnüche' a'.

Jetz' kummt die Gschicht', do freilich derf
Nit alls schö' Wetter sey',
Do hörscht aach dunnre, sunscht is 's nix,
Un' blitze' drunner 'nei',

Un' 's Mädche' deß muß in de' Storm,
In G'fahre, Angscht un' Graus,
Daß Alles meent, sie geht zu Grund
Un' kummt gar nimmer 'raus. –

So weit is 's Dichte' juscht ke' Kunscht,
Wie aber fangscht es a',
Daß all' die Noth dem Mädche' doch
Am End' ke' Leed's getha'?

Deß is so leicht nit wie mer meent
D'rum mache's Viel' e so:
Sie loße' sterbe' deß arme Ding
Un' sich! der Schluß is do'.

Ich aber kann deß nit, mir werd
Wahrhaftich 's Herz d'rum schwer,
Als wann do deß gedichte' Kind
Mei' werklichi Tochter wär',

Sie dauert mich, dann recht betracht'
Bin ich an All'm schuld
Un' hab' se 'nei in's Unglück g'sterzt
Mit wahrer Ungeduld,

Un' nor daß's aus werd, soll ich ietz'
Noch gar ihr Mörder sey,
Ne', b'hüt' mich Gott, daß kann ich nit,
Deß fallt mer gar nit ei'.

Ich muß ihr helfe', geht's wie's will,
Deß macht viel' Sorg' un' Plooch
Un' tief bekümmert sitz' ich oft
Un' denk' all's d'rüber noch.

Drum Gschichteschreibe heest nit viel,
Wann eener hart un' kalt,
Doch der, wo hot e' weech's Gemüth,
Bei dem hot's Naupe' halt.