Ascheberger Sprüch

Im Schwoihi’er’ Wald da wääß ich e Hellche

Glei’ newwer’em frische Felsequellche,

Von dem hert mer die Leit’ als sage

Da hette sich ’mol zwä Freind erschlage,

Un weil es nachts immer hett’ so gewimmert,

Hett’ mer des Hellche dort gezimmert,

Seitdem da wär’ gesiehnt de Mord

’es Hellche wär’ e sicherer Ort

Fer alle Leide, alle Schmerze,

Wou annere hawwe uff’m Herze.

Letzthi’ da kumm’ ich halt aach an des Quellche

Querdorch’n Wald grad’ an des Hellche,

Do hot de Schorsch die Lies’ im Arm

Un kißtse ab! Mir werd’s ganz warm!

Ich hab’ mich hinner’en Busch gebickt

Un mich ganz leisje beiseit’ gedrickt,

Bin umgekehrt un nix wie fort:

’es Hellche is e sicherer Ort

Fer alle Leide, alle Schmerze,

Wou annere hawwe uff’m Herze.