Ascheberger Sprüch

Sou’n Lehrer, mei’, der hot e Plag’

Mit seine Bube alle Schlag,

Kä’ Wunner, wenn er werd verdrosse,

Die babbele un mache Posse

Un zowwele sich, un käner ruht.

Nor wenn er ebbes frage duht,

Da sein se alle blöd un faul

Un glotze blouß un halte ’s Maul.

Des mecht ’n Lehrer desparat:

»Eich fehlt es halt am Bildungsgrad!

Es erscht is doch vor alle Schticke,

Sich kloor un deitlich auszudricke!

Es is e Kreiz! Ihr wißt kän Deit!

Es is e Unbehilflichkeit

Im kloore Ausdruck, in de Schprach’;

Da paßt halt uff, wenn ich was sag’;

Es is aach wohr! Werd’ endlich g’scheidter,

Ihr Lausbube, jetz fohr’n mer weiter!

Hend uff die Bank! Paßt uff recht fein! -

Wer werft dann do? - Zum Deif’l nein!«

De Lehrer redt von annere Sache,

Die Bube pätze sich un lache,

Er redt von dem un dem gor viel’s,

Sou kumme se aach uff’n Filz.

Da säigt de Lehrer: jetz’ paßt acht,

Was is de Filz? Wie werd er gemacht?«

Da is es widder meisjeschtill,

Kä Änziger was sage will,

Un alle sein se blöd un faul

Un glotze blouß un halte ’s Maul.

Da fängt de Lehrer an un schennt:

»Jetz’ kriegt er awwer uff die Hend!

Was is de Filz? Wie werd er gemacht?

Ich hab’s eich dreimal scho’ gesagt!

Is doch kä Kunst’, kä Wisseschaft!

Dorch Walze, Schtouß un Hewwelkraft

Veriwwle’ sich die Hasehoor,

Dadorch verfilze se sich, ni’ wohr?

Un dadedorch entschtäiht de Filz!

Ganz kloor! Un käner merke will’s!

Eich fehlt de Ausdruck in de Schprach’!

Wer lacht da? Grimm, schtäih’ uff, sag’s nach!«